‘छक्कापञ्जा-४’ आउँदै : निमार्ण दिपकराज गिरीले गर्ने

Best Khabar Team | २०७६ पुष १२ गते शनिबार

२८ डिसेम्बर, २०१९
काठमाडौं । नेपाली चलचित्र क्षेत्रमा ‘सेरिज’ चलचित्रहरु बन्ने क्रम पछिल्ला वर्षहरुमा बढ्दै गएको छ । यही क्रममा राम्रो व्यापार गर्न सफल ‘छक्का पञ्जा’ ले अब चौथो श्रृङ्गखला (सेरिज) सार्वजनिक गर्ने भएको छ । ‘छक्का पञ्जा’, ‘छक्का पञ्जा १’, ‘छक्का पञ्जा २’, ‘छक्का पञ्जा ३’ को सफलतासँगै अब दर्शकहरुले ‘छक्का पञ्जा ४ ’ हेर्न पाउने भएका हुन् ।

यसको निर्माण भने सफल चलचित्र निर्माण दिपकराज गिरीले गर्ने भएका छन् । गिरीले निर्माण गरेको ‘छ माया छपक्कै’ चलचित्रले पछिल्लो समयमा राम्रो व्यापार गरेपछि ‘छक्का पञ्जा ४’ निर्माण गर्ने निर्णयमा गिरी पुगेका हुन् । चलचित्रको निर्माण र लेखन कलाकार गिरीले नै गर्नेछन् ।

गिरीका अनुसार यसको निर्देशन दीपाश्री निरौलाले गर्ने भएकी छन् भने चलचित्रको पटकथा लेखनको काम समेत शुरु भै सकेको छ । यो चलचित्रमा पनि गिरीलाई हास्य कलाकारहरु केदार घिमिरे र जितु नेपाललगायतले साथ दिनेछन् । रमाइलो कुरा के छ भने यो चलचित्रको शुरु ‘छक्का पञ्जा ३’ को समाप्तिबाटै हुनेछ ।