नेपालमा कोरोना : नयाँ संक्रमित भन्दा निको भएर घर फर्कनेको संख्या बढी

Best Khabar Team | २०७७ श्रावण १ गते बिहिबार

१५ जुलाई, २०२०
काठमाडौं । नेपालमा पछिल्ला केहीदिनयता कोरोना संक्रमितको संख्या घट्न थालेको छ । स्वास्थ्य तथा जनसंख्या मन्त्रालयले आज गरेको नियमित पत्रकार सम्मेलनमा देशभर कुल १ सय ६७ जनामा मात्रै कोरोना संक्रमण पुष्टि भएको जनाएको छ । यो पछिल्लो २४ घण्टा यता देखिएका कोरोना संक्रमितको नयाँ तथ्यांक हो । यो तथ्यांक अनुसार नेपालमा कोरोना संक्रमितको संख्या अब विस्तारै घट्ने क्रममा रहेको देखिएको छ ।

मन्त्रालयले आज दिएको जानकारी अनुसार देशभर परिक्षणको क्रम पनि जारी रहेपनि संक्रमितको संख्या भने ह्वात्तै घट्न थालेको छ । भारतबाट आउनेहरुको संख्या निक्कै कम हुने गरेको र देशभित्र पनि अहिले आशिंक लकडाउनको अवस्था रहेकोले पनि संक्रमितको संख्या घट्न थालेको चिकित्सकहरुले जनाएको छ । बाहिरबाट आएकाहरुले पनि क्वारेन्टाइनमै बसेर नियम पालन गरेकोले पनि कोरोना संक्रमण फैलन नपाएको विज्ञहरु बताउँछन् । नेपालमा हालसम्म १७ हजार ३ ४४ जनामा कोरोना संक्रमण पुष्टि भएको छ ।

ती मध्ये ११ हजार २ सय ४९ भाइरसमुक्त भएका छन् भने ३९ जनाको मृत्यु भएको छ । मन्त्रालयले आज गरेको पत्रकार सम्मेलनमा काठमाडौं उपत्यकामा पछिल्लो २४ घण्टायता एक जनापनि संक्रमित भेटिएका छैनन् । यही अवधिमा २ सय १३ जना निको भएर घर फर्केका छन् । सरकारले अहिले जिल्लाभित्र मात्रै गाडीहरु सञ्चालन गर्न अनुमति दिएको भएपनि सीमा नाका तथा अन्र्तराष्ट्रिय तथा राष्ट्रिय उडानहरुमा प्रतिबन्ध लगाएको छ ।

यद्यपि अत्यावश्यकीय सामान ल्याउन प्रयोग हुने विमान तथा चार्डर उडानहरु भने नियमित छ ।