झण्डै १ दर्जन देशमा राजदूत नियुक्त गर्ने ओली सरकारको निर्णय देउवा नेतृत्वको सरकारद्वारा खारेज

Best Khabar Team | २०२६ पुष १७ गते बिहिबार

१९ जुलाई, २०२१
काठमाडौं । विश्वका विभिन्न ११ देशका लागि नेपाली राजदूत नियुक्त गर्ने केपी ओली नेतृत्वको सरकारको निर्णयलाई वर्तमान सरकारले खारेज गरिदिएको छ । प्रधानमन्त्री शेरबहादुर देउवा नेतृत्वको नवगठित सरकारले आज मन्त्रीपरिषद्को बैठक बसेर विभिन्न देशमा राजदूत नियुक्त गर्ने ओली सरकारको निर्णय खारेज गरेको हो ।

केपी ओली नेतृत्वको सरकारले गएको जेठ १ गते अष्ट्रेलिया, डेनमार्कलगायत ११ देशमा राजदूत नियुक्त गर्ने निर्णय गरेर विभिन्न व्यक्तिको नाम समेत सिफारिस गरेको थियो । तर यसरी सिफारिस भएका मध्य अधिकांश नामहरु प्रधानमन्त्री ओलीका सचिवालयमा कार्यरत कर्मचारी तथा एमाले नेता कार्यकर्ताका आफन्त रहेको सार्वजनिक भएपछि सरकारको चर्को विरोध हुँदै आएको थियो । यस्तै ओलीले संसदीय सुनुवाईमार्फत विभिन्न देशमा राजदूत नियुक्त गर्ने प्रक्रियाको विपरित राजदूत सिफारिस गरेको भन्दै एमालैभित्रैबाट गुनासो आइरहेको थियो ।

सर्वोच्चको आदेशसँगै गठन भएको वर्तमान सरकारले आज मन्त्रीपरिषद्को बैठक बसेर केपी ओली नेतृत्वको सरकारले गरेको तत्कालीन नियर्ण विवादास्पद एवं प्रक्रियासंगत नभएको भन्दै यसलाई खारेज गरिदिएको हो । यो सँगै सरकारले अब संयुक्त अधिराज्य रूस, अष्ट्रेलिया, श्रीलंका, दक्षिण कोरिया, इजिष्ट, ब्राजिल, डेनमार्क, म्यानमार, अरेबिया, बहराइन, अष्ट्रियालगायतका रिक्त ११ देशमा नयाँ राजदूत नियुक्तीका लगि नयाँ प्रक्रिया अघि बढाउने भएको छ ।