उपत्यकाभित्रकै २ एनसेल टावरमा अज्ञात समूहको आगजनी

Best Khabar Team | २०७६ पुष २९ गते मंगलबार

१४ जनवरी, २०२०
काठमाडौं । अज्ञात समूहले काठमाडौं उपत्यकाभित्रका विभिन्न स्थानमा रहेका एनसेलका टावरमा आगजनी गरेको छ । काठमाडौंको उत्तरी क्षेत्रमा अवस्थित जितपुरफेदीमा रहेको एनसेल टावर र दक्षिणी क्षेत्रको दक्षिणकालीमा रहेको अर्को टावरमा गएराति आगजनी भएको हो ।

काठमाडौंको तारकेश्वर नगरपालिकास्थित जितपुर फेदीमा रहेको सो टावरमा गएराति १ बजेतिर अज्ञात समूहले पेट्रोल खन्याएर आगो लगाएको बताइएको छ । यस्तै दक्षिणकाली नगरपालिकास्थित छैमलेको टावरमा पनि सोही प्रकृतिको घटना भएको छ । राति करिब २ बजेको समयमा सो टावरमा आगजनी भएको हो । आगजनीलगत्तै सो क्षेत्रमा एनसेल मोबाइलको सेवा अवरुद्ध बनेको छ ।

विगत लामो समयदेखि राज्यलाई लाभकर तिर्न एनसेलले आनाकानी गर्दै आइरहेका कारण देशका दुई दर्जनबढी स्थानमा रहेका एनसेलका टावरहरुमा अज्ञात समूहले आगजनी गर्दै आइरहेका छन् । काठमाडौंमा भएको यो घटनामा पनि कसको संलग्नता रहेको छ भन्ने केही खुल्न सकेको छैन । यद्यपि नेत्रविक्रम चन्द नेतृत्वको माओवादीले विगत देखि नै एनसेललक्षित आक्रमण गर्दै आएका कारण यो घटनामा पनि उनीहरुकै संलग्नता भएको हुनसक्ने आशंका प्रहरीको छ ।

Comment from facebook