नेपालमा असार २१ (जुलाई ५) सम्मका लागि लम्बियो नियमित हवाई उडानमाथिको प्रतिबन्ध (विज्ञप्तिसहित)

Best Khabar Team | २०७७ जेठ ३२ गते आइतबार

१४ जुन, २०२०
काठमाडौं । सरकारले कोरोना भाइरसको संक्रमण फैलनसक्ने खतरालाई मध्यनजर गर्दै आन्तरिक तथा बाह्य हवाई उडानमा लगाउँदै आएको प्रतिबन्ध ३ साता थप गरेको छ । कोरोना नियन्त्रणसम्बन्धी उच्चस्तरीय सरकारी संयन्त्रले यसअघि आजसम्मका लागि यात्रुबाहक हवाई जहाजहरुको नियमित आन्तरिक तथा बाह्य उडानमाथि (जेठ ३२ गते) आजसम्मका लागि प्रतिबन्ध लगाएको थियो ।

तर पछिल्ला केहीदिनयता नेपालमा कोरोना संक्रमितको संख्या ह्वात्तै बढ्न थालेपछि नियमित हवाई उडानमाथिको प्रतिबन्ध थप २१ दिन बढेको छ । यो निर्णय पछि अब आगामी जेठ २१ गते (जुलाई ५, २०२०) सम्म देशभित्र र बाहिरबाट कुनैपनि यात्रुबाहक विमानले नेपालमा नियमति उडान भर्ने छैनन् । तर विदेशमा रहेका यात्रुहरुलाई लिएर आउने चार्टर उडान तथा नेपाल भित्रैबाट हुने चार्टर उडानमा भने सरकारको अनुमति लिएर सञ्चालन हुनेछन् ।

**नागरिक उड्डयन प्राधिकरणले जारी गरेको विज्ञप्ति ।**

सरकारले गएको चैत्र ५ गतेदेखि लकडाउन शुरु गरेर त्यसको केहीदिनपछि हवाई उडानमाथि पनि प्रतिबन्ध लगाउँदै आएको थियो । पछिल्लो पटक असार १ गतेबाट आन्तरिक उडानका लागि अनुमति दिने तयारी गरेको भएपनि तराईका जिल्लामा कोरोना महामारीको रुपमा फैलिइरहेको भन्दै असार २१ सम्मका लागि उडान अनुमति रोकिएको नेपाल नागरिक उडड्यन प्राधिकरणले जनाएको छ ।