Best Khabar Team | २०२६ पुष १७ गते बिहिबार

---

१७ मे, २०२०
काठमाडौं । कोरोना संक्रमणबाट प्रभावित हुने तथा ज्यान गुमाउनेको संख्या बढ्दै जाँदा उच्चस्तरीय समन्वय समितिले सरकारलाई लकडाउनको समय थपगर्न सुझाव दिएको छ । आज समितिको बालुवाटारमा बसेको कोभिड १९ उच्चस्तरीय समितिको बैठकले संक्रमण रोक्नका लागि लकडाउनको विकल्प नभएको भन्दै सरकारलाई लकडाउन लम्ब्याउन सिफारिस गरेको हो । समितिले कम्तीमा आगामी जेठ १५ सम्मका लागि लकडाउन थप्नका लागि सुझाव समितिको समितिसम्बद्द एक सदस्यले बेस्टखबर डटकमलाई जानकारी दिए ।

स्मरणीय के छ भने छिमेकी मुलुक भारतले पनि जेठ १५ सम्मका लागि लकडाउनको समय थप गरिसकेको छ । समितिले कोरोना संक्रमणको उच्च जोखिममा नपरेका जिल्लाहरुमा भने अवस्था अनुसार विस्तारै लकडाउनको स्वरुप बदल्न सक्ने भन्दै त्यसको मोडालिटी पनि सरकारलाई दिएको छ । समितिले दिएको यो सुझावमा थप छलफल गरी आजै साँझ बस्ने मन्त्रीपरिषद्को बैठकमार्फत् यो विषयमा सरकारले निर्णय लिने बताइएको छ ।

सरकारले गएको चैत्र ५ गतेदेखि कोरोना संक्रमण रोक्नका लागि भन्दै देशव्यापी रुपमा लकडाउनको आह्वान गरेको थियो । यसबीचमा पटक पटक थप्दै सरकारले जेठ ५ गतेसम्मका लागि लकडाउन कायम गरेको छ । लकडाउनको अन्तिमपटक थपिएको समयावधि भोलि सकिँदैछ । लकडाउनको ५९ दिनको दिउँसोसम्म कोरोनाका कारण २ सय ९१ जना संक्रमित बनेका छन् भने २ जनाको ज्यान गै सकेको छ । यस्तै यसबीचमा ३७ जनाको उपचार सफल भएको छ ।

---

Comment from facebook