विदेशमा रहेका नेपालीहरुको दोश्रो चरणको ‘रेस्क्यु फ्लाईट’ अनिश्चितकालका लागि बन्द

Best Khabar Team | २०७७ भाद्र १ गते सोमबार

१७ अगस्ट, २०२०
काठमाडौं । कोरोना भाइरसको संक्रमण रोक्न गरिएको लकडाउनका कारण विश्वका विभिन्न मुलुकमा रोकिएर रहेका नेपालीहरुलाई नेपाल ल्याउन सरकारले गर्न लागेको ‘रेस्क्यु फ्लाइट’ (उद्दार उडान) अनिश्चितकालका लागि स्थगित भएको छ ।

भदौ १ गतेदेखि विश्वका विभिन्न मुलुकमा रहेका नेपालीहरुलाई उद्दार उडानमार्फत् नेपाल ल्याउने तयारी यसअघि सरकारले गरेको थियो । दोश्रोचरणमा चरणमा सरकारले खाडी राष्ट्रलगायत अमेरिका तथा युरोपेली मुलुकबाट नेपालीहरुलाई उद्दार गर्ने तयारी गरेको थियो । तर पछिल्लो समयमा देशभित्र कोरोना संक्रमण बढ्दो क्रममा रहेको र यसरी उद्दार गरेर ल्याइनेहरुका बस्नका लागि आवश्यक पर्ने क्वारेन्टाइनको व्यवस्थापन नभैसकेकोले उडान स्थगित गर्नुपरेको कोभिड १९ संकट व्यवस्थापन सञ्चालन केन्द्रले जानकारी दिएको छ ।

केन्द्रले आज संस्कृति, पर्यटन तथा नागरिक उड्डयन मन्त्रालयलाई पत्रपठाई तत्कालका लागि उद्दार उडान रोक्नका लागि भनेको हो । पत्रमा केन्द्रले उद्दार गरिएकाहरुका लागि क्वारेन्टाइन बनाउनका लागि होटलहरुसमेत प्राप्त नभैसकेको उल्लेख छ । सरकारले विभिन्न देशमा करिब १० हजार नेपालीहरुलाई यसअघि पहिलो चरणको उद्दार उडानमार्फत् नेपाल ल्याएको जनाएको छ ।