राष्ट्रिय सभाका रिक्त सदस्य चयनका लागि माघ ९ मा चुनाव प्रस्ताव

Best Khabar Team | २०७६ भाद्र २६ गते बिहिबार

१० डिसेम्बर, २०१९
काठमाडौं । निर्वाचन आयोगले राष्ट्रिय सभाका रिक्त सदस्यहरुको चुनावी प्रक्रिया आगामी माघ ९ गते गर्ने प्रस्ताव गरेको छ । प्रधानमन्त्री केपी शर्मा ओलीलाई भेटेर आयोगले सभामा रिक्त एक तिहाइ सदस्यको चुनावको मिति प्रस्ताव गरेको हो ।

आगामी फागून २० गते पदावधि सकिन लागेका १९ जना सदस्यहरुको पदावधि सकिनु झण्डै डेढ महिना अघि नै चुनाव गर्न आयोगले सरकारसमक्ष मिति प्रस्ताव गरेको हो । २०७४ साल फागून २१ गते पदभार ग्रहण गरेका ५९ सदस्य मध्ये १९ जनाको २ वर्षे कार्यकाल सकिनुअघि नै आयोगले चुनाव गर्ने गरी मिति प्रस्ताव गरेको हो ।

त्यसो त राष्ट्रिय सभाको पदावधि ६ वर्ष रहने भनिए पनि पहिलो पटकका लागि एक तिहाइको पदावधि दुई वर्ष, अर्को एक तिहाइको चार वर्ष र बाँकी एक तिहाइको ६ वर्ष रहने संवैधानिक व्यवस्था अनुसार उनीहरुको पदावधि फागून २० मा सकिन लागेको हो । राष्ट्रिय सभाका ५९ सदस्यीय मध्ये ३ जना सरकारको सिफारिसमा राष्ट्रपतिबाट मनोनीत भएका हुन् ।