एकैदिन थपिए ५९ जना कोरोना संक्रमित, भक्तपुर, धरान, मकवानपुर र बारामा थप ९ जनामा कोरोना, संक्रमित ५१६ पुगे

Best Khabar Team | २०२६ पुष १७ गते बिहिबार

२२ मे, २०२०
काठमाडौं । देशका विभिन्न स्थानमा आजमात्रै ५९ जनामा कोरोना संक्रमण पुष्टि भएको छ । सरकारले आज बिहान ३० जनामा, दिउँसो २० जना र अहिले साँझ ९ जना गरी देशभर ५९ जनामा आजमात्रै कोरोना संक्रमण भएको पुष्टि गरेको छ । शुक्रबार राति साढे ८ बजे जारी गरेको विज्ञप्ति अनुसार थप ९ जनामा कोरोना संक्रमण भेटिएको छ ।

स्वास्थ्य तथा जनसंख्या मन्त्रालयले जारी गरेको विज्ञप्ति अनुसार भक्तपुरमा १, मकवानपुरका १ र धरानमा १ गरी थप ३ जनामा कोरोना संक्रमण देखिएको छ । यस्तै बाराको सिम्रौनगढका थप ६ जनामा कोरोना संक्रमण पुष्टि भएको हो । भक्तपुरमा ४२ वर्षकी महिला संक्रमणमामा परेको मन्त्रालयले पुष्टि गरेको छ । यस्तै मकवानपुरमा ५४ वर्षकी एक महिला र धरानमा ३५ वर्षका पुरुषमा कोरोना देखिएको हो । बाराको सिमग्रनगढमा देखिएका सबै पुरुष रहेका छन् ।

उनीहरु २२ देखि ४५ वर्ष उमेर समूहका रहेका छन् । सरकारले यसअघि आजै डडेलधुरा, बैतडी, बाँके, नवलपरासी, नवलपरासीपूर्व, चितवन, कपिलबस्तु र सर्लाही जिल्लामा गरी ५० जनामा कोरोना संक्रमण देखिएको पुष्टि गरिसकेको छ । संक्रमित सबैको अवस्था सामान्य रहेको र उनीहरुलाई सम्बन्धित जिल्लास्थित आइसोलेसनमा राखेर चिकित्सकको निगरानीमा उपचार भै रहेको बताइएको छ । हालसम्म देशभरबाट ७१ जना उपचारपछि घर फर्केका छन् भने ३ जनाको कारोना संक्रमणमा परी ज्यान गएको छ ।