चुनावी सभामा गोली लागि घाइते अमेरिकी पूर्वराष्ट्रपति खतरामुक्त, अस्पतालबाट डिस्चार्जलगत्तै पुनः चुनावी अभियानमा

Best Khabar Team | २०८१ असार ३० गते आइतबार

१४ जुलाई, २०२४ न्यूर्योक, अमेरिका । गोली लागि घाइते अमेरिकी पूर्व राष्ट्रपति डोनाल्ड ट्रम्पको अवस्था खतरामुक्त रहेको अस्पतालले जनाएको छ । चुनावी -यालीलाई सम्बोधनका क्रममा भएको सभामा अमेरिकी समयअनुसार शनिबार राति पेन्सिलभेनिया राज्यमा पूर्वरापष्ट्रपति ट्रम्पमाथि गोली प्रहार गरिएको थियो । गोली ट्रम्पको दाहिने कानमा लागेको बताइएपनि यसको औपचारिक पुष्टि हुन सकेको छैन ।

अमेरिकी सञ्चारमाध्यमहरुले मञ्चमा रहेका पूर्वराष्ट्रपति ट्रम्पको अनुहारको दाहिने कान छेउबाट रगत बगिरहेको तस्वीरहरु सार्वजनिक गरेका छन् । त्यस क्रममा गोली प्रहार गर्ने २० वर्षीय युवक प्रहरी कारबाहीमा मारिएका छन् । घटनालगत्तै प्रहरीले ट्रम्पलाई नजिकैको अस्पतालमा लगेको थियो । ट्रम्पको अवस्था सामान्य रहेको अस्पतालको भनाई उद्दृत गर्दै सञ्चारमाध्यमहरुले जनाएका छन् । उनी केही घण्टाको अस्पताल बसाईपछि डिस्चार्ज भएको रोयटर्सले जनाएको छ । अस्पतालबाट डिस्चार्ज भएलगत्तै उनी पुनः चुनावी अभियानमा सक्रिय रहेको बताइएको छ ।

अमेरिकामा आगामी नोभेम्बर महिनाका हुने राष्ट्रपति चुनावका लागि निर्वातमान राष्ट्रपति जो बाइडन र पूर्वराष्ट्रपति ट्रम्पबीच प्रतिस्पर्धा हुँदैछ । ट्रम्पले रिपब्लिकनका तर्फबाट प्रतिनिधित्व गर्नेछन् भने डेमोक्रेट उम्मेद्वारको रुपमा बाइडन चुनावी मैदानमा भिड्दैछन् ।