नेपालमा कोरोना संक्रमण रोक्न सरकारले गरेको प्रयास सकारात्मक

Best Khabar Team | २०७६ चैत्र २९ गते शनिबार

काठमाडौं । नेपाल सरकारले कोरोना नियन्त्रणका लागि हालसम्म गरेको प्रयास तुलनात्मक रुपमा उत्साहप्रद रहेको छ । भलै सरकारले १ साता ढिलो गरी अन्र्तराष्ट्रिय उडान तथा लकडाउन गरेको भएपनि अहिलेसम्म चालेका अधिकांश कामहरु सन्तोषजनक रहेको छ । सरकारले हाल छिमेकी मुलुकसँगको सिमा नाकादेखि अन्र्तराष्ट्रिय क्षेत्रबाट नेपालमा हुने यात्रुबाहक विमानहरुको उडान, एक जिल्ला र प्रदेशबाट अर्को जिल्ला तथा प्रदेशमा चल्ने सार्वजनिक गाडीहरु बन्द गरेको छ ।

यस्तै एउटा स्थानीय तहबाट अर्को स्थानीय तहमा आउजाउ गर्न पनि सरकारले रोक लगाएको छ । देशका सबै विद्यालय, क्याम्पस बन्दछन् । होटल तथा रेस्टुरेन्ट समेत बन्द भएका छन् । अझ भनौ सिँगो देश नै लकडाउनको अवस्थामा छ । सरकारले सिँगो देशलाई लकडाउनमा राखेर नेपाल आएका र कोरोनाको संक्रमणकाृ आशंका भएकाहरुलाई यतिबेला क्वारेन्टाइनमा राखेर उपचार थालेको छ । यसबीचमा हालसम्म कोरोनाको आशंकामा स्वाब परीक्षण गरिएका मध्ये ८ जनामा मात्रै संक्रमण देखिएको र उनीहरु उपचारमा छन् । बाँकी १ जना सफल उपचारपछि घर फर्केका छन् ।

विश्वका विभिन्न मुलुक र नेपालको तुलना गर्ने हो भने युरोप र अमेरिकाको तुलनामा नेपालमा लकडाउन निक्कै प्रभावकारी बनेको छ । युरोप र अमेरिकामा अहिले पछि कतिपय होटल तथा रेस्टुरेन्ट खुल्ला छन् । कोरोना प्रभावित भएर सरकारले इमरजेन्सी लागू गरेको भएपनि युरोपका कतिपय देशका सडकमा गाडीहरु सञ्चालन भै रहेका छन् ।

भलै ती देशका रात्रीकालीन बजार, धेरै मानिसहरु भेला भएर खेलाइने फुटबल, टेबल टेनिस, भलिबललगायतका खेलहरु बन्दछन्, केही देशमा होटल तथा रेस्टुरेन्ट समेत पूर्ण रुपमा बन्द भएका छन् । विद्यालय र क्याम्पसहरुले अहिले अनलाईनमा कक्षा सञ्चालन गरिरहेका छन् । तरपनि सडक तथा डिपार्टमेन्टल स्टोरहरुमा मानिहरुको चाप बाक्लै देखिने गरेको विभिन्न सञ्चारमाध्यमहरुले तस्वीर भिडियोसहितका समाचार सार्वजनिक गरेका छन् ।

तर नेपालमा अत्यावश्यकीय सेवामा रहेकाहरुबाहेक अन्यलाई घरबाहिर निस्कन र चोच तथा गल्लीमा भेला हुनसमेत दिइएको छैन । जसले गर्दा कोरोना संक्रमण फैलिन नदिन महत्वपूर्ण भूमिका निर्वाह गरेको छ । अब खुल्ला सिमाको फाइदा उठाउँदै भारतबाट नेपाल आउने नेपाली तथा भारतीयहरुलाई रोक्न सकेको खण्डमा नेपाल तत्कालका लागि कोरोनाको जोखिमबाट धेरै हदसम्म टाढा हुने अनुमान गर्न सकिन्छ ।

तर छिमेकी मुलुकमा कोरोना बढी रहेको सन्दर्भमा तत्काल सीमा खुल्ला गरिए र उनीहरुलाई सिमाको बाटो हुँदै नेपाल प्रवेश गर्न दिएको अवस्थामा भने नेपालले सँधै जोखिम मोल्नुपर्ने देखिएको छ । त्यसो त प्रधानमन्त्रीले आज सबै प्रदेशका प्रमुखहरुसँगको छलफलमा तत्कालका लागि सिमा नखुल्ने तथा सिमावर्ती क्षेत्रको १ किलोमिटरमा २ जनाका दरले सशस्त्र प्रहरी परिचालन गर्ने बताएका छन् ।

अन्र्तराष्ट्रिय मुलुकबाट आउने यात्रुबाहक विमानहरुलाई सरकारले आगामी अप्रिल ३० तारिखसम्मको लागि रोक लगाउने निर्णय गरिसकेको छ । यसका अलावा सरकारले साँच्चै सिमा क्षेत्रबाट नेपाल आउनेहरुलाई तत्कालका लागि रोक्न सकेको खण्डमा कोरोना नियन्त्रण हुने देखिएको छ । नेपालसँग प्राप्त साधनस्रोत अनुसार विश्वका विभिन्न देशका तुलनामा नेपाल सरकारले गरेको यो प्रयास साँच्चै नै प्रशंसनीय छ ।