नाटक देखाउन आएका ४ कलाकार युरोपमै लुकेपछि…

Best Khabar Team | २०७६ आश्विन २० गते सोमबार

१० जुलाई, २०१९
बर्लिन । नेपाली नाटक ‘घेरो’ देखाउनका लागि युरोप आएकामध्ये ४ जना युरोपबाट नपर्केपछि नेपाली नाट्यक्षेत्रमा अहिले विभिन्न खाले टिकाटिप्पणी शुरु भएको छ । त्यसो त विभिन्न कार्यक्रममा युरोप आएर यतै लुकेर यहाँको स्थायी आवासीय अनुमति कार्ड लिने नेपालीहरुको पुरानै चलान भएको छ ।

यही क्रममा पोखराको युथ क्रियसन थिएयटरबाट आएका १२ जना कलाकार मध्ये ४ जना कलाकार कार्यक्रम सकिएलगत्तै युरोपमै लुकेको बताइएको छ । युरोपमा लुक्ने कलाकारमा शर्मिला बस्नेत, सम्झना शर्मा, अञ्जना भनेर चिनिने संरचना पौडेल र मधुसूदन पौडेल छन् । कार्यक्रम सकेर असार २३ गते ८ जना कारकारमात्रै नेपाल फर्केपछि बाँकी चार जना कलाकार युरोपमै लुकेको बताइएको छ ।

आयोजक संस्थालाई कलाकार लुकाउन भूमिका खेलेको भन्दै सामाजिक सञ्जालमा टिका टिप्पणी हुन थालेपछि आयोजक युथ क्रियसन थिएयटरले यसको खण्डन गरेको छ । सो थियटरका सचिव सौगात पोखरेलले सामाजिक सञ्जालमा सम्पर्क विहिन भएका ४ जना विभिन्न बहानामा आफूहरुसँगबाट सम्पर्क विहिन भएको भन्दै उनीहरुलाई लुकाउन वा भगाउन हामीमध्ये कसैले सहयोग गरेको भए वा पैसा लेनदेन गरेको भए कारबाहीको भागेदारी हुन तयार रहेको उल्लेख गरेका छन् ।

तर फरार भएका भनिएका एक कलाकार मधुसूदन पौडेलले आफू युरोपेली मुलुक पोर्चुगलमा रहेको र आफू खुसी यहाँ आएको बताएका छन् ।