भारतमा अस्पतालको शिशु स्याहार केन्द्रमा आगलागी, ९ शिशुको मृत्यु

Best Khabar Team | २०७७ पुष २५ गते शनिबार

०९ जनवरी, २०२१
नयाँदिल्ली, भारत । भारतको महाराष्ट्रस्थित एक अस्पतालको शिशु स्याहार केन्द्रमा आगलागी हुँदा १० जना नवजात शिशुको मृत्यु भएको छ । भारतीय सञ्चारमाध्यमहरुले दिएको जानकारी अनुसार महाराष्ट्रको भण्डारामा रहेको शिशु अस्पतालको नवजात शिशु स्याहार केन्द्रमा आगो लागेको थियो ।

आगलागीमा परी १० जना नवजात शिशुको घटनास्थलमै ज्यान गएको बताइएको छ । अस्पतालमा लागेको आगो र त्यसपछि जमेको धुँवामा निसास्सिएर उनीहरुको मृत्यु भएको बताइएको छ । घटनामा परेका ७ जना नवजात शिशुको जिवितै उद्दार गरिएको छ । गएराति १ बजेतिर अस्पतालमा एक्कासी आगो लागेको थियो ।

घटनास्थल भारतका मुम्बईबाट करिब ९ सय किलोमिटरको दुरीमा रहेको छ । रातिको समयमा लागेको आगो स्थानीयवासिन्दा तथा दमकलको सहारामा आज बिहानमात्रै पूर्णरुपमा नियन्त्रणमा आएको थियो । आगलागीको कारण खुल्न सकेको छैन । रातिको समयमा विद्युत् सर्ट भएर आगो लागेको हुनसक्ने आशंका गरिएको छ । अहिले अस्पताल प्रशासनले घटनाको कारणबारे अनुसन्धान थालेको छ । जिवितै उद्धार गरिएका ७ जना शिशुहरुको अवस्था सामान्य रहेको बताइएको छ ।