पाल्पाका एक पुरुषको कोरोनाबाट मृत्यु : देशभर मृतकको संख्या १० पुग्यो

Best Khabar Team | २०७७ जेठ २२ गते बिहिबार

०४ जुन, २०२०
तानसेन, पाल्पा । जिल्लाको पूर्वखोला गाउँपालिका घर भएका एक पुरुषको कोरोनाका कारण ज्यान गएको छ । काठमाडौंमा स्वास्थ्य मन्त्रालयले आज पत्रकार सम्मेलन गरी दिएको जानकारी अनुसार पूर्वखोला गाँउपालिका वडा नम्बर १ सिलुवा टोल बस्ने ४० वर्षका नाम नखुलाईएका एक युवकको कोरोनाका कारण ज्यान गएको पुष्टि भएको छ ।

उनी कोरोनाबाट नेपालमा ज्यान गुमाउने दशौं व्यक्ति बनेका छन् । मिसन अस्पतालको आइसोलेसनमा उपचारका क्रममा उनको मंगबार मृत्यु भएको थियो । स्वाब परीक्षणका क्रममा उनमा कोरोना संक्रमण पुष्टि भएको मन्त्रालयको भनाई छ । उनलाई गाउँपालिकाले बनाएको जल्पाको वडा नम्बर २ स्थित क्वारेन्टाइनमा राखिएको थियो । तर उनमा कोरोनासँग मिल्दोजुल्दो लक्षण देखिएपछि र अवस्था विग्रँदै गएपछि सदरमुकाम तानसेन नजिकै रहेको मिसन अस्पतालमा उपचारार्थ भर्ना गरिएको थियो ।

उपचारकै क्रममा उनको मंगलबार निधन भएको हो । उनको मृत्यु भएपछि उनको सम्पर्कमा रहेका क्वारेन्टाइनका अन्यको पनि स्वब परीक्षण थालिएको जिल्ला जनस्वाथ्य कार्यालयले जनाएको छ।