सरकारको दाबी : ‘नेपाल अब मगन्ते र सडक बालबालिका मुक्त देश बन्यो’

Best Khabar Team | २०७७ असार ४ गते बिहिबार

१८ जुन, २०२०
काठमाडौं । सरकारले नेपाल अब सडक बालबालिका र मगन्ते मुक्त देश भएको दाबी गरेको छ । प्रधानमन्त्री केपी शर्मा ओलीले आज राष्ट्रिय सभाको बैठकलाई सम्बोधन गर्दै नेपालका सडकमा अब अब भिख माग्ने मान्छे र वेवारिसे अवस्थामा बसेका सडक बालबालिकालाई देख्न नपाईने दाबी गरे ।

**राष्ट्रिय सभाको बैठकलाई सम्बोधन गर्दै प्रधानमन्त्री ओली ।**

प्रधानमन्त्री ओलीले आफू नेतृत्वको सरकारको पहिलो प्राथमिकतामा सडक बालबालिका र सडकमा भिखमाग्ने मान्छेहरु परेकोले अब यो अभियानले सार्थकता पाएको बताए । उनले भने –“कोरोनाको महामारीपछि माननीय ज्यूहरु विश्वका विभिन्न देशमा पुगेर प्रबचन दिनुहन्छ होला । त्यतिबेला गर्वका साथ भन्नुहोला नेपाल अब भिखारी र सडक बालबालिका मुक्त देश भयो भनेर ।’’ प्रधानमन्त्री ओलीले अब मुलुकमा कसैले भीख मागेर खान नपर्ने र सडकमा मागेर बस्ने तथा वेवारिसे बालबालिकालाई समेत देख्नु नपर्ने बताए ।

सरकारले जनताको जीवनसँग प्रत्यक्ष सम्बन्ध राख्ने विभिन्न विषयलाई विशेष महत्वका साथ हेरिरहेको भन्दै भोलिका दिनमा अब कामकै लागि विदेश जाने अवस्था नआउने उनको दाबी छ । रुकुम घटना तथा क्वारेन्टाइनमा महिला बलात्कृत भएको दुबै घटना दुःखद भएको भन्दै घटनामा संलग्न दोषीलाई हदैसम्मको कारबाही गर्ने स्पष्ट पारे ।