बाग्लुङ्गको ढोरपाटनमा बाढीले एकदर्जन बढी घर बगायो, ८ को मृत्यु, केही वेपत्ता

Best Khabar Team | २०७७ भाद्र १८ गते बिहिबार

०२ सेप्टेम्बर, २०२०
बलेवा, बाग्लुङ्ग । बाग्लुङ्गको ढोरपाटन नगरपालिकाको लाँकुरीबोट भन्ने ठाउँको खोला छेउको बस्तीमा पसेको बाढीले बगाएका मध्ये ८ जनाको शव प्राप्त भएको छ । मृतकको सनाखत हुन सकेको छैन ।

जिल्ला प्रहरी कार्यालयले दिएको जानकारी अनुसार ढोरपाटन नगरपालिका वडा नम्बर सात, आठ र नौ भएर बग्ने भुजी खोलामा आएको बाढी खोला छेउको तटीय क्षेत्रको बस्तीमा पसेको थियो । बाढीले १२ भन्दा बढी घर बगाएको छ भने हालसम्म केही स्थानीय वेपत्ता भएका छन् । वेपत्ता भएकामध्ये ८ जनाको शव भेटिएको छ भने अझै केहीको खोजी कार्य जारीछ । हिजो दिनभर परेको पानी र राति थप बर्षा भएपछि खोला उर्लेर बाढीको रुपमा बस्तीमा पसेको थियो ।

विशेष गरी बाढीले ढोरपाटनको सेराबाङ्ग, सुर्कुदुङ्ग र बोबाङ्गका स्थानीयको घर बगाएको छ । साथै घर माथिबाट पहिरोसमेत खसेका कारण उनीहरु थप समस्यामा परेका छन् । घटनास्थलमा ढोरपाटन शिकार आरक्षमा खटिएका सेना, प्रहरी र सशस्त्र प्रहरी बल घटनास्थल पुगेर उद्दार शुरु गरेको छ । बाढीले स्थानीय जलविद्यूत् परियोजना, विद्यालय र केही पुलहरुसमेत बगाएको छ ।