ललितपुरमा शुक्रबार १८ घण्टे कर्फ्यूको घोषणा

Best Khabar Team | २०७७ भाद्र १८ गते बिहिबार

०३ सेप्टेम्बर, २०२०
सानेपा, ललितपुर । रातो मत्स्येन्द्रनाथको रथ तान्ने क्रममा प्रहरी र स्थानीय वासिन्दाबीच भएको झडप र त्यसपछि उत्पन्न परिस्थितिलाई लिएर जिल्ला प्रशासन कार्यालयले भोलि बिहान ४ बजेदेखि राति १० बजेसम्म ललितपुरमा कर्फ्यू आदेश जारी गरेको छ । सरकारले जारी गरेको निषेधाज्ञाकै समयमा स्थानीय वासिन्दा रातो मत्स्येन्द्रनाथको रथयात्रामा सहभागी भएपछि आज दिउँसो ललितपुरको पुल्चोकमा रथयात्रामा सहभागी र प्रहरीबीच झडप भएको थियो ।

रथ तान्न भेला भएकाहरुलाई त्यहाँबाट धपाउन प्रहरीले अश्रुग्याँस र पानीको फोहोरासमेत प्रहार गरेको थियो । घटनामा रथयात्रामा सहभागी र सुरक्षामा खटिएका प्रहरी दुबैतर्फ केही घाइते समेत भएका छन् । त्यसपछि उत्पन्न परिस्थिति र सम्भावित झडपलाई मध्यनजर गर्दै स्थानीय प्रशासनले भोलि (शुक्रबार) बिहान ४ बजेदेखि राति १० बजेसम्म ललितपुर महानगरपालिका क्षेत्रभित्र १८ घण्टे कर्फ्यू आदेश जारी गरेको हो ।

घटनापछि उत्पन्न परिस्थिति, भावी सुरक्षालगायतलाई लिएर जिल्लाका सुरक्षानिकाय, राजनीतिक दल र स्थानीय प्रशासनबीच भएको भर्चुअल बैठकपछि जिल्लामा भोलि कर्फ्यू आदेश जारी गर्ने निर्णय भएको जिल्ला प्रशासन कार्यालयले जनाएको छ । कफर्यु उल्लंघन गर्नेमाथि गोलीसमेत प्रहार गर्नसक्ने चेतावनी स्थानीय प्रशासनले दिएको छ ।

Comment from facebook