ओखलढुंगाबाट काठमाडौं आउँदै गरेको बस दुर्घटना : ६ को मृत्यु, २८* घाइते

Best Khabar Team | २०७९ फाल्गुन २८ गते आइतबार

१२ मार्च, २०२३
सिन्धुलीगढी, सिन्धुली । ओखलढुंगाबाट काठमाडौं आउँदै गरेको यात्रुबाहक बस आज बिहान सिन्धुलीमा दुर्घटनामा परेको छ । बस दुर्घटनामा परी ६ जनाको मृत्यु भएको छ भने अन्य कम्तीमा २८ घाइते भएका छन् । बा २ ख ६५९६ नम्बरको सो बस आज बिहान अन्दाजी ९ बजे २ सिन्धुलीको फिक्कल गाउँपालिका वडा नम्बर ४ कुइभिरमा दुर्घटनामा परेको हो ।

मृत्यु हुनेमा तीनजना पुरुष, दुई महिला र एक बालिका रहेको जिल्ला प्रहरी कार्यालय सिन्धुलीले जनाएको छ । दुर्घटनास्थलमै ५ जनाको ज्यान गएको र बाँकी एक जनाको उपचारको लागि अस्पताल लैजाँदै गर्दा बाटैमा मृत्यु भएको बताइएको छ । बसमा अन्दाजी ३५ जना यात्रु रहेको बताइएको छ । मध्यपहाडी राजमार्ग अन्तर्गत फिक्कल गाउँपालिका वडा नम्बर ४ कुइभिरमा सडकको भित्तामा ठोक्किएर बस दुर्घटना भएको बताइएको छ ।

प्रहरीका अनुसार सडकमा तीब्र गतिमा गुडिरहेको बसका चालकले बसको नियन्त्रण गुमाउँदा बस सडक छेउमा रहेको भित्तामा ठोकिएको अनुमान गरिएको छ । दुर्घटनाग्रस्त बसका चालक फरार रहेको र उनको खोजी भै रहेको प्रहरीले जनाएको छ । दुर्घटनामा घाइते भएकाहरुलाई उपचारका लागि खुर्कोट अस्पताल पु-याइएको छ । गम्भीर घाइतेहरुलाई हेलिकोप्टरमा राखेर काठमाडौंमा उपचारका लागि पठाउने तयारी भएको छ ।

* यसअघि प्रकाशित समाचारमा २८ घाइते हुनुपर्नेमा असावधानीबस २० हुन गएकोले क्षमायाचनासहित सच्चाइएको छ । सम्पादक ।