पर्वतको पहिरो अपडेट : मृतकको संख्या ८ पुग्यो, १ अझै वेपत्ता

Best Khabar Team | २०७७ जेठ ३२ गते आइतबार

१४ जुन, २०२०
फलेबास, पर्वत । पर्वतको सदरमुकाम कुस्मा नजिकैको दुर्लुङ्गमा गएराति वर्षासँगै आएको पहिरोमा परी ज्यान गुमाउनेको संख्या ८ पुगेको छ । यसअघि हिजो राति अबेरसम्म २ जनाको मृत्यु भएको र ७ जना वेपत्ता भएको बताइएपनि सुरक्षाकर्मी र स्थानीय वासिन्दाले गरेको खोजी तथा उद्दार कार्यमा आज मध्यान्हसम्म थप ६ जनाको शव भेटिएको छ ।

पर्वतको कुश्मा नगरपापिलकाको वडा नम्बर ३ मा पर्ने दुर्लुङस्थित ढकालबारी भन्ने ठाउँमा स्थानीय दुई घर पहिरोले पुरिएको थियो । घर नजिकै रहेका एउटा डाँडोबाट खसेको पहिरोमा परी स्थानीय तुलबहादुर थापा र कमला विकको घर परिँदा दुई घरमा रहेका ९ जना वेपत्ता भएका थिए ।

प्रहरी र स्थानीय वासिन्दाले गरेको खोजबीनका क्रममा तुलबहादुर थापा, उनकी श्रीमती मिनकुमारी थापा र एक ११ वर्षकी बालिकाको शव गएराति निकालिएको छ । थापाको परिवारका ६ जना सदस्य र कमला विकको घरका ३ जना सो पहिरोमा परेर वेपत्ता भएका थिए । वेपत्तामध्ये थप ५ जनाको शव भेटिएको प्रहरीको भनाई छ । घटनामा हराईरहेका एकको अवस्था अझै अज्ञात रहेको र खोजी कार्य जारी रहेको प्रहरीले जनाएको छ ।

यो पनि पढ्नुहोला ।