पर्वतको दुर्लुङ्मा भीषण पहिरो, २ घर पुर्दा ७ वेपत्ता, २ को शव भेटियो

Best Khabar Team | २०२६ पुष १७ गते बिहिबार

१३ जुन, २०२०
फलेबास, पर्वत । पर्वत जिल्लाको सदरमुकाम कुस्मासँगै जोडिएको दुर्लुङ्गमा केहीबेरअघि भीषण पहिरो गएको छ । करिब २ घण्टाअघिदेखि शुरुभएको भारी वर्षासँगै गएको पहिरोमा परेका कुस्मा नगरपालिका वडा नम्बर ३ दुर्लुङ्गमा २ वटा घरहरु बगाएको स्थानीयले बताएका छन् ।

दुर्लुङ्गको सरनचौरमा रहेको स्थानीय तुलबहादुर थापा र कमला विकको घर पहिरोले पुर्दा कम्तीमा ९ जना वेपत्ता भएको बताइएको छ । उनीहरुमध्ये २ जनाको शव भेटिएको खबर प्राप्त भएको छ । सो घटनामा १ जना महिला र एक बालिकाको शव फेला परेको बताइएपनि भीषण वर्षा जारी रहेकोले घटनाको बारेमा विस्तृत विवरण प्राप्त हुन सकेको छैन ।

अहिले घटनास्थलमा स्थानीय वासिन्दा र प्रहरीको टोली पुगेर पहिरोमा पुरिएकाहरुको खोजी कार्य तीब्र बनाएको छ । घटनामा अहिलेसम्म ७ जना वेपत्ता भएको र दुई जनाको शव भेटिएको स्थानीय वडाका प्रतिनिधिले बेस्टखबर डटकमलाई जानकारी दिएका छन् ।

Comment from facebook