पहलगाम आक्रमणको जवाफ ‘अप्रेसन सिन्दुर’बाट फकाउँदै भारत : पाकिस्तानका विभिन्न स्थानमा आक्रमण, दर्जनौं मारिए

Best Khabar Team | २०८२ असार २१ गते शनिबार

०७ मे, २०२५
नयाँदिल्ली, भारत । गत अप्रिल २२ तारिखका दिन भारतको जम्मू–कश्मिरको पहलगाममा भएको आक्रमणको विरोधमा भारतले गएराति जवाफी कारबाही शुरु गरेको छ । गएराति भारतले पाकिस्तानका कश्मीर क्षेत्रमा रहेका ९ वटा आतंकवादी केन्द्रलाई लक्षित गरी गरेको आक्रमणमा परी ३५ जनाको मृत्यु भएको अन्र्तराष्ट्रिय सञ्चारमाध्यमहरुले जनाएका छन् । भारतले भने सो आक्रमणमा परी भारतविरुद्ध आतंककारी गतिविधि गर्दै आएका दर्जनौं आतंककारीको ज्यान गएको दाबी गरेको छ । त्यसो त दशकौंदेखि भारत पाकिस्तानबीच लडाई चलिरहेको भएपनि पछिल्लो पटक गत अप्रिल २२ तारिखका दिन भारतको जम्मुकस्मीर क्षेत्रमा रहेको पहलगामको पर्यटकीय क्षेत्रमा पाकिस्तानी आतंककारी समूहले गरेको आक्रमणमा परी नेपालका सुदिप न्यौपानेसहित २६ जनाको ज्यान गएको थियो ।

त्यस लगत्तै भारतीय प्रधानमन्त्री नरेन्द्र मोदीले अकल्पनीय क्षति हुने गरी भारतले त्यसको जवाफ फर्काउने भन्दै सार्वजनिक अभिव्यक्ति दिएका थिए । पहलगाम घटनाको १५ दिन वित्न नपाउँदै भारतीय सेनाले गएराति पाकिस्तानी क्षेत्रमा आक्रमण शुरु ड्रोन तथा मिसाईल आक्रमणबाट ठूलो जनधनको क्षति भएको हो । भारतले विशेष गरी पाकिस्तानी क्षेत्रमा रहेका बहावलपुर, मुरिद्येक, सियालकोटलगायतका क्षेत्रमा आक्रमण थालेको छ । भारतले पाकिस्तानमा मसूद अजहर नेतृत्वको अतिवादी समूह जैश ए मोहम्मद को बहालिपुरमा रहेको शिविरमा हमला गरी शिविरलाई नै ध्वस्त पारिदिएको दाबी गरेको छ ।
त्यस्तै, मुरिद्केमा रहेको हफिज सइद नेतृत्वको लश्कर ए तइबाको शिविरमा पनि हमला गरेको भारतले जनाएको छ। स्मरणीय के छ भने पहलगाम हमलाको जिम्मेवारी लिने रेजिस्टेन्ट फ्रन्ट (आरटिएफ) समूह लस्करे ए तोवाईवाकै समूह भएको दाबी भारतीय सञ्चारमाध्यमहरुले गरेका छन् ।

यसैबीच पाकिस्तानी सञ्चारमाध्यमहरुले भने आक्रमणमा संलग्न भारतका पाँचवटा फाइटर जेट पाकिस्तानी सुरक्षा अधिकारीहरुले खसालेको दाबी गरेको छ । तर भारतीय पक्षले भने यसबारेमा कुनै आधिकारिक धारणा सार्वजनिक गरेको छैन। भारत पाकिस्तानबीच युद्द शुरुभएलगत्तै पाकिस्तानको आकाश हुँदै युरोप र एसियाका विभिन्न स्थानमा जाने विमानहरुले बाटो परिवर्तन गरेका छन् । भारत पाकिस्तानद्वन्द्वको असर छिमेकी मुलुक नेपालमा समेत देखिनसक्ने भन्दै नेपाल भारत सिमावर्ती क्षेत्रमा सुरक्षा व्यवस्था कडा पारिएको नेपाली सुरक्षा निकायहरुले जनाएका छन् ।