मुगुमा सामूहिक हत्या प्रकरण : प्रहरीको विशेष अनुसन्धान टोली घटनास्थलमा

Best Khabar Team | २०८० कार्तिक ११ गते शनिबार

२८ अक्टोबर, २०२३
गमगढी, मुगु । मुगुको छायाँनाथ रारा नगरपालिकामा एकै परिवारका ४ जनाको समूहिक हत्या भएको घटनाको अनुसन्धानका लागि नेपाल प्रहरीको विशेष अनुसन्धान टोली घटनास्थल पुगेको छ । बाँकेको कोहलपुलबाट तालिमप्राप्त कुकुरसहित प्रहरी अधिकारीहरुको विशेष टोली आज बिहान स्थानीय मुन्दु गाउँ पुगेका हो । टोलीले आजैबाट घटनाको विषयमा विस्तृत अनुसन्धान गर्ने जिल्ला प्रहरी कार्यालय मुगुले जानकारी दिएको छ ।

शुक्रबारदेखि स्थानीय प्रहरीले घटनास्थललाई सिल गरेर राखेको छ । मुगेको छायाँनाथ रारा नगरपालिका–५ मुन्दु गाउँमा शुक्रबार बिहान एकै परिवारका ४ जनाको शव भेटिएको थियो । प्रहरीले दिएको जानकारी अनुसार स्थानीय २८ वर्षकी श्रीदेवी बोहोरा, उनका ११ र १ वर्षका छोराहरु क्रमश मनोज र रहर बोहोरा तथा सात वर्षकी छोरी अप्सरा बोहोरा घरमै मृत अवस्थामा भेटिएका थिए । श्रीदेवीका श्रीमान् बैदेशिक रोजगारीमा रहेका बेला उनको परिवारका ४ जनाको धारिलो हतियार प्रयोग गरी हत्या गरिएको स्थानीयले जानकारी दिएका छन् ।

मुगुको सदरमुकामदेखि ३ घन्टा टाढा रहेको मुन्दु गाउँकी श्रीदेवी माइतमा दशैंको टिका लगाएर घर फर्केकै भोलिपल्ट दुई छोरा र छोरीसहित मृत अवस्थामा भेटिएकी हुन् । उनीहरु सबैको हत्या भएको आशंका गर्दै प्रहरीले विशेष ढंगले अनुसन्धान अघि बढाएको छ । घटनामा गाउँकै व्यक्तिको संलग्नता हुनसक्ने आशंका गरिएको छ । घटना सुनेलगत्तै श्रीदेवीका श्रीमान् दिपक बोहोरा कतारबाट काठमाडौं फर्केका छन् । उनीपनि आजै साँझसम्म मुगुस्थित घर आइपुग्ने बताइएको छ ।