अमेरिकी औषधी विज्ञको दाबी : ‘परिवर्तित कोरोना’का विरुद्ध पनि भ्याक्सिन उपयोगी

Best Khabar Team | २०२६ पुष १७ गते बिहिबार

२५ जनवरी, २०२१
न्यूर्योक, अमेरिका । कोरोना भाइरसका विरुद्ध अमेरिकी कम्पनीले बनाएको फाइजर नामक भ्याक्सिन कोरोनाको परिबर्तित रुपका संक्रमितका लागि समेत प्रभावकारी भएको अमेरिकी औषधी कम्पनीसम्बध बैज्ञानिकहरुले दाबी गरेका छन् । केही समय आघि बेलायत तथा दक्षिण अफ्रिकामा देखिएको कोरोनाको परिवर्तितरुपको भाइरस नियन्त्रणका लागि पनि हालै प्रयोगमा आएको कोरोना भ्याक्सिन प्रभावकारी रहेको ती कम्पनीले जनाएका छन् ।

कोरोनाको परिवर्तित अर्थात् भेरियन्ट स्वरुपलाई नियन्त्रणका लागि पनि यो भ्याक्सिनले सुरुवाती चरणमा प्रभावकारी रुपमा काम गरेको बिबिसीले आफ्नो समाचारमा उल्लेख गरेको छ । हालै अमेरिकी बैज्ञानिकहरुले नयाँ कोरोनाका संक्रमित (बेलायत र दक्षिण अफ्रिकामा देखिएका नयाँ प्रकारको कोरोना संक्रमित) विरामीलाई खोप दिएर गरेको परिक्षणका क्रममा खोपले प्रभावकारी रुपमा काम गरेको बताइएको छ ।

खोपले कोरोना विरुद्ध प्रभावकारी रुपमा लड्नका लागि शुरुवाती अवस्थामा उत्साहजचक रुपमा काम गरेको र अझै परिक्षण जारी रहेकोले यसको रिजल्ट पूर्ण सकारात्मक आउनेमा आफूहरु विश्वस्त रहेको औषधी उत्पादक कम्पनीका बैज्ञानिकहरुको दाबी छ ।

यद्यपि यसको पूर्ण पुष्टिका लागि भने थप अध्ययन र थप समय आवश्यक पर्ने उनीहरुले बताएका छन् । अहिले बजारमा आएको कोरोना भाइरस विरुद्धको भ्याक्सिन कोरोना भाइरसको पहिलो चरणमा देखिएको भाइरसको प्रकृतिलाई लक्षित गरी बनाइएको थियो । तर यसको परिवर्तित रुपपछि यो भाइरसले काम गर्नेमा विज्ञहरुले आशंका गरिरहेकै बेला अमेरिकी बैज्ञानिकहरुको यो भनाई सार्वजनिक भएको हो ।

यसले कोरोना नियन्त्रणका लागि भै रहेको प्रयासमा एउटा बलियो आशा जगाएको छ । अहिले बजारमा आएको भ्याक्सिनले कोरोना संक्रमितको शरिरको प्रतिरक्षा प्रणालीद्वारा निर्मित एन्टीबडीलाई रोकेर भाइसरलाई शरीरका विभिन्न कोशिकाहरु पुग्न नदिन प्रभावकारी रुपमा काम गर्ने विज्ञहरुले बताएका छन् ।