तत्काल सार्वजनिक गाडी सञ्चालन गर्न सक्दैनौं : यातयात व्यवसायी

Best Khabar Team | २०७७ आश्विन २१ गते बुधबार

१० जुलाई, २०२०
काठमाडौं । सरकारले तत्काल देशभरका यातयात व्यवसायीलाई जिल्लाभित्र सार्वजनिक गाडी सञ्चालन गर्न अनुमति दिएपनि यातयात व्यवसायीहरुले भने यथास्थितिमा सवारी साधन सञ्चालन गर्न नसकिने बताएका छन् । विगतमा सवारी साधन खरिद गर्दा बैंकबाट लिएको ऋण रकमको व्याज र किस्ता तिर्न नसकेको अहिलेको अवस्थामा आफूहरुको यो समस्या सम्बोधन नभएकोले तत्काल गाडी चलाउन नसक्ने व्यवसायीले बताएका हुन् ।

लकडाउनका कारण विगत ४ महिनादेखि गाडीहरु सञ्चालन नहुँदा पैसा कमाउन नसकिएको र बैंकको ब्याज र किस्ता समेत तिर्न नसकिएको व्यवसायीको भनाई छ । सरकारले वार्तामार्फत् आफूहरुको मागलाई सम्बोधन गरेमात्रै तत्काल गाडीलाई मर्मत सम्हार गरेर गाडी चलाउन सक्नेतर्फ सरकारको ध्यानाकर्षण गराएका छन् । अहिले थन्किएका गाडीहरुलाई सञ्चालन गर्नका लागि कम्तीमा ५० हजार देखि ३ लाख सम्म ‘सर्भिसिङ्ग चार्ज’ लाग्ने व्यवसायीको दाबी छ । तर सरकारले व्यवसायीको मर्कालाई नबुझी केबल गाडीमात्रै चलाउन अनुमति दिएकोले अहिलेको अवस्थामा सार्वजनिक गाडी सञ्चालन गर्न नसकिने उनीहरुले बताएका छन् ।

व्यवासयीहरुको आजको बैठकले सरकारले हिजो जिल्ला भित्रमात्रै सार्वजनिक गाडी चलाउन दिने सरकारको निर्णय स्वागतयोग्य भन्दै तत्काल आफूहरुको मागलाई समेत सम्बोधन हुने गरी निर्णय गर्न अनुरोध गरेको छ । व्यवसायीहरुलाई सहुलतपूर्ण कर्जा र बैंकबाट दिइने व्याजमा केही प्रतिशत छुट गर्न पनि महासंघले सरकारको ध्यानाकर्षण गरेको छ ।

यस्तै महामारीको बेला गाडी चलाउँदा हुनसक्ने सम्भावित जोखिमलाई मध्यनजर गर्दै चालक तथा सहचालकका लागि उचित स्वास्थ्य सुरक्षाको प्रबन्ध गर्न पनि व्यवसायीले सरकारसँग माग गरेका छन् ।