नेपालको इन्टरनेट सेवामा २० प्रतिशत मूल्य बढ्दै, घाटा उपभोक्ताको थाप्लोमा

Best Khabar Team | २०७६ जेठ १९ गते आइतबार

०२ जुन, २०१९
काठमाडौं । विश्वबजारमा इन्टेरनेट सेवामा मूल्य दिनप्रतिदिन घट्दै गएपनि नेपालमा भने इन्टरनेटको मूल्य बढ्ने भएको छ । आगामी साउन १ गतेदेखि लागूहुने गरी इन्टरनेट सेवा प्रदायकहरुले मूल्य बढाउन लागेका हुन् । गतवर्ष सरकारले इन्टरनेट सेवामा १३ प्रतिशत महशुल थप गरेकोमा सेवा प्रदायकहरुले यो आर्थिक वर्षबाट लागूहुने गरी इन्टरनेटको मूल्य बढाउन लागेका हुन् ।

आगामी साउन १ गतेदेखि लागूहुने गरी इन्टरनेट सेवामा २० प्रतिशत बढी शुल्क लगाउने तयारीमा इन्टरनेट सेवा प्रदायकहरु जुटेका हुन् । गत वर्ष सरकारले इन्टरनेट सेवामा १३ प्रतिशत महशुल शुल्क थप गरेको थियो । यो महशुल सेवा प्रदायकले वेहोर्नुपर्ने निर्णय गरेपछि तत्कालीन अवस्थामा मूल्यबृद्धि गर्ने योजनामा उनीहरु रहेपनि यसको विरोध भएको थियो । तर चालु आर्थिक वर्षको बजेटमार्फत बढाइएको कर नउठेपछि अब सरकारले सर्वसाधारणसँग उठाउन खोजेको इन्टरनेट सेवा प्रदायक सङ्घले जनाएको छ ।

यद्यपि नेपालले इन्टरनेटकोे मूल्य बढाउनु अन्तर्राष्ट्रिय दूरसञ्चार संघ (आईटियू) सँग गरेको प्रतिवद्धता विपरितको कार्य हो । यसअघि नेपालले दूरसञ्चार सेवालाई सस्तो, गुणस्तरीय र दीगो विकासको आधार बनाउने भनेर आइटियूसँग प्रतिबद्धता गरेपनि मूल्य बृद्धिसँगै यो सम्झौता विपरितको काम हुनेछ ।