लकडाउन खुकुलो : नीजि सवारी साधन जोर विजोर गरेर चल्न दिइने, पसलहरु खुल्ने, लामो दुरीका गाडी तत्काल सञ्चालन गर्न नपाईने

Best Khabar Team | २०७७ आश्विन २० गते मंगलबार

१० जुन, २०२०
काठमाडौं । कोरोना भाइरसको संक्रमणका कारण मुलुकभर जारी लकडाउनलाई खुकुलो बनाउने निर्णय सरकारले गरेको छ । नेपाल सरकार मन्त्रीपरिषद्को आज बसेको बैठकले भोलिदेखि नै लागू हुने गरी लामो दुरी बाहेकका निजी गाडीहरु सञ्चालनमा ल्याउने निर्णय गरेको हो । त्यसका लागि जोर विजोर प्रणाली लागू हुने सरकारको भनाई छ ।

यस्तै सरकारले भोलिदेखि नै आवश्यक सुरक्षा सावधानी अपनाएर निजी पसलहरु खोल्न दिने बताएको छ । कोरोना भाइरसको संक्रमण बढ्नसक्ने भन्दै सरकारले गएको चैत्र ५ गतेदेखि मुलुकभर लकडाउनको घोषणा गरेको थियो । जसका कारण सिँगो मुलुकमा अत्यावश्यक सेवाका सवारी साधन तथा तथा पसलहरुमात्रै सञ्चालनमा रहेका छन् । पछिल्लो समयमा लकडाउनका कारण जीवन धान्नै अप्ठेरो परेको भन्दै मजदुर तथा व्यवसायीहरुले लकडाउन खुकुलो बनाउन सरकारको ध्यानाकर्षण गराउँदै आएका थिए ।

सरकारले देशका विभिन्न जिल्लामा कोरोना संक्रमण जारी रहेको भन्दै एउटा जिल्लाबाट अर्को जिल्लामा जाने लामो दुरीका गाडीहरु भने तत्काल सञ्चालनमा ल्याउन नदिने निर्णय गरेको छ । लकडाउन खुकुलो बनाउने निर्णयसँगै त्यसको मोडालिटी पनि सरकारले तयार गरेको छ । मोडालिटीबारे विस्तृत जानकारी भोलि सार्वजनिक गर्ने तयारी सरकारको छ ।