कोरोनाबाट नेपालमा चौधौं मृत्यु : स्याङ्जाका पुरुषले पोखरामा ज्यान गुमाए

Best Khabar Team | २०७७ श्रावण २२ गते बिहिबार

०८ जुन, २०२०
लेकसाईड, कास्की । । नेपालमा कोरोना संक्रमणबाट थप एकजनाको ज्यान गएको छ । कास्कीको पोखरामा उपचारका क्रममा स्याङ्गजाका एक पुरुषको ज्यान गएको गण्डकी प्रदेश सामाजिक विकास मन्त्रालयले जनाएको छ । योसँगै नेपालमा कोरोनाकै कारण ज्यान गुमाउनेको संख्या १४ पुगेको छ । ६० वर्षका ती पुरुषको स्थायी घर स्याङ्गजा जिल्लाको वालिङ्ग नगरपालिका रहेको बताइएको छ ।

मृगौला रोगको उपचारका लागि भारतको मुम्बई पुगेका उनमा जेठ २१ गते नेपाल फर्किलगत्तै कोरोनासँग मिल्दोजुल्दो लक्षण देखिएको थिए । पोखरा स्वास्थ्य विज्ञान प्रतिष्ठानको आइसोलेसनमा रहेका उनको स्वाब परीक्षणका क्रममा आइतबार कोरोना संक्रमण पुष्टि भएको थियो ।

उपचारकै क्रममा उनको गएराति ज्यान गएको अस्पताल स्रोतले जानकारी दिएको छ । भारतबाट आएका नेपालीहरुलाई सीमा नाकाबाट उद्दार गर्ने क्रममा वालिङ्ग नगरपालिकाले उनलाई जेठ २१ गते सुनौली नाकाबाट उद्दार गरेर पोखरा स्वास्थ्य विज्ञान प्रतिष्ठानमा उपचारार्थ भर्ना गरिएको थियो । अस्पतालमा भर्ना गर्ने बेलामै उनको अवस्था गम्भीर रहेको नगरपालिकाले जनाएको छ ।