ललितपुरको किष्ट अस्पतालमा उपचाररत एक विरामीको मृत्यु, अस्पताल भन्छ : ‘स्वाब परीक्षणमा कोरोना संक्रमण देखियो’

Best Khabar Team | २०७७ जेठ १४ गते बुधबार

२७ मे, २०२०
काठमाडौं । ललितपुरको ग्वार्को इमाडोलमा रहेको किष्ट अस्पतालमा उपचारत एक विरामीको आज साँझ उपचारका क्रममा मृत्यु भएको छ । ललितपुर महानगरपालिका वडा नम्बर २२ का ५६ वर्षका एक पुरुषको उपचार हुँदा हुँदै मृत्यु भएको अस्पतालले जनाएको छ । मृतक ती पुरुषको कोरोना परीक्षणका क्रममा पोजेटिभ रिपोर्ट आएको अस्पतालले जनाएको छ ।

यद्यपि यसको औपचारिक पुष्टि भने स्वास्थ्य मन्त्रालयले गरिसकेको छैन । गएको जेठ ११ गते अस्पताल भर्ना भएका उनको १२ गते स्वाब निकालेर पाटन अस्पतालमा परिक्षणका लागि पठाइएको थियो । पीसीआर विधिबाट गरिएको स्वाब परीक्षणमा उनमा कोरोना संक्रमण पुष्टि भएको अस्पताल स्रोतले जानकारी दिएको छ । यद्यपि उनी उनी विभिन्न रोगबाट पीडित बनेर अस्पतालमा उपचारार्थ भर्ना भएका थिए ।

सोही क्रममा उनमा केही लक्षण कोरोनासँग मिल्दोजुल्दो देखिएपछि अस्पतालले स्वाब परीक्षणका लागि नमुना पाटन अस्पताल पठाएको थियो । ललितपुरका जनस्वास्थ्य प्रमुख खगेश्वर गेलालले पनि सञ्चारकर्मीसँगको कुराकानीमा मृतक ती पुरुषको पीसीआर रिपोर्ट पोजेटिभ आएको बताएका छन् । घटनालगत्तै अहिले ती व्यक्तिको शवलाई सुरक्षित स्थानमा राखेर अस्पतालमा उनको उपचारमा संलग्न चिकित्सकलाई क्वारेन्टाइनमा राख्ने तयारी भै रहेको छ ।

यस्तै किस्ट अस्पतालको आइसियु कक्षलाई समेत सिलगर्ने तयारी भएको अस्पताल स्रोतले जानकारी दिएको छ । ललितपुरमा कोरोना संक्रमित भेटिएको यो पहिलो घटना हो ।