फिनल्याण्डमा १६ वर्षकी किशोरीलाई २४ घण्टाका लागि प्रधानमन्त्रीको जिम्मेवारी !

Best Khabar Team | २०७७ आश्विन २२ गते बिहिबार

०८ अक्टोबर, २०२०
हेलसिंकी, फिनल्याण्ड । युरोपको सम्पन्न मध्येको एक मुलुक फिनल्याण्डकी ३४ वर्षकी प्रधानमन्त्रीले एकदिनका लागि आफूभन्दा आधा उमेर कम भएकी एक किशोरीलाई प्रधानमन्त्रीको जिम्मेवारी सुम्पिएकी छन् ।

फिनल्याण्डकी ३४ वर्षकी प्रधानमन्त्री सन्ना मारिन र १६ वर्षकी किशोरी आभा मुर्तो

फिनल्याण्डकी ३४ वर्षकी प्रधानमन्त्री सन्ना मारिनले आभा मुर्तो नामकी एक १६ वर्षकी किशोरीलाई राष्ट्रसंघले मनाउने बालिका दिबसको अवसर पारेर बुधबार (अक्टोबर ०७ ) का दिन प्रधानमन्त्रीको जिम्मेवारी दिएकी हुन् । विश्वमा लैङ्गिक समानता कायम गर्न किशोरकिशोरीलाई प्रविधिमैत्रि बनाउने उद्देश्यले यो जिम्मेवारी प्रदान गरिएको फिनल्याण्ड सरकारले जनाएको छ । उनलाई प्रधानमन्त्रीको जिम्मेवारी दिइएपनि उनलाई कुनै नीतिगत तथा राजनीतिक निर्णयको अधिकार दिइएको थिएन ।

बुधबार आयोजित एक कार्यक्रममा विश्वका विभिन्न मुलुकबाट सहभागीहरुसमक्ष आभाले आफ्नो विचार व्यक्त गरेकी थिइन् । ‘गल्स टेकओभर’ नामक यो कार्यक्रमले विशेष गरी राज्यको हरेक निकायमा महिला र लैङ्गिक समानताको सुनिश्चितता गर्नका लागि अन्र्तराष्ट्रिय रुपमा दबाब सिर्जना गर्दै आएको छ ।