क्यानडामा कोरोना संक्रमित दैनिक बढ्दै, झण्डै २५ हजार संक्रमित पुग्दा ७ सय ३५ को मृत्यु

Best Khabar Team | २०२६ पुष १७ गते बिहिबार

१३ अप्रिल, २०२०
टोरन्टो । पछिल्ला दिनहरुमा क्यानडामा कोरोना संक्रमितको संख्या बढ्दै गएको छ । हालसम्म कोरोना संक्रमितको संख्या २४ हजार ८ सय ३३ पुगेको छ । आजमात्रै ४ सय ४० जना नयाँ संक्रमित थपिएका छन् ।

हिजो यही समयमा क्यानडामा १ हजार ६५ जना नयाँ संक्रमित थपिएका थिए । हिजोमात्रै ६४ जनाको ज्यान कोरोनाको संक्रमणका कारण गएको थियो भने आज मात्रै ज्यान गुमाउनेको संख्या १८ पुगेको छ । क्यानडामा कोरोना संक्रमित मध्ये ७ हजार ४ सय १२ जनाको स्वास्थ्यमा सुधार भएको छ । कोरोनाका कारण क्यानडाभर हालसम्म ७ सय ३५ जनाले ज्यान गुमाईसकेका छन् ।

यो समाचार तयार पार्दासम्म ५ सय ५७ जनाको अवस्था गम्भीर रहेको छ । क्यानडामा पहिलो पटक गत फेब्रअरी १५ मा कोरोनाको संक्रमण देखिएको थियो । शुरुमा ८ जनामा कोरोनाको संक्रमण देखिएको भएपनि त्यसको २ महिना पुग्न लाग्दा संक्रमितको संख्या २५ हजारको हाराहारीमा पुगेको छ । पछिल्लो पटक अप्रिल ११ मा १ हजार १ सय ७० जनामा संक्रमण देखिएको थियो भने अप्रिल १० मा १ हजार ३ सय ८३ संक्रमित नयाँ थपिएका थिए ।

यस्तै अप्रिल ९ मा १ हजार ३ सय २७ र अप्रिल ८ मा १५ सय ४१ जना संक्रमित भएको यहाँको सरकारी तथ्यांकले देखाएको छ । कोरोनाका कारण सबैभन्दा बढी प्रभावित राज्यको रुपमा क्युबेक रहेको छ । जहाँ १२ हजार ८ सय ५० जना संक्रमित हालसम्म भेटिएका छन् ।

यस्तै ओन्टारियोमा ७ हजार ४ सय ७० जना संक्रमित भेटिएका छन् । , यस्तै अल्बेर्टामा १ हजार ६ सय ५१, ब्रिटिस कोलम्बियामा संक्रमितको संख्या १ हजार ४ सय ४५ पुगेको छ ।