कोरोना कहरकै बीच बेलायतले ग-र्यो प्राथमिक विद्यालय खोल्ने निर्णय : जुन १ बाट विभिन्न क्षेत्रलाई सहज बनाइने प्रधानमन्त्रीको घोषणा

Best Khabar Team | २०७७ १५ गते बिहिबार (28/05/2020 AD)

२८ मे, २०२०
वेस्टह्याम । कोरोनाको महामारीकाबीच झण्डै २ महिनादेखि जारी आपत्कालीन प्रावधानहरुलाई हटाएर बेलायतले आगामी जुन १ तारिखबाट जनजीवन सामान्य गर्ने घोषणा गरेको छ । यहाँका प्रधानमन्त्री बोरिस जोनसनले आज सार्वजनिक गरेको भनाई अनुसार आगामी सोमबार अर्थात् जुन १ तारिखबाट एक वा एकभन्दा बढी परिवारका बढीमा ६ जना एकआपसमा भेटघाट गर्न सकिने बताएका छन् ।

यसअघि बेलायतमा दुईजना भन्दा बढी व्यक्तिहरुलाई एकआपसमा भेटघाट गर्न प्रतिबन्ध लगाईको थियो । तर नयाँ जारी भएको नियम अनुसार यसरी भेट गर्ने व्यक्तिहरुले आपसी दुरी भने कायम गर्नुपर्ने भएको छ । कम्तीमा २ मिटरको फरकमा एक आपसमा भेटघाट गर्न सक्ने भन्दै सरकारले बाहिर हिँड्दा आवश्यक सुरक्षा सावधानी भने अनिवार्य रुपमा अपनाउन निर्देशन दिएको छ । सरकारको यो निर्णयसँगै अप्ठेरोमा परेको एक परिवारले अर्को परिवारको लागि सहयोग गर्न सकिने अवस्था समेत सिर्जना भएको छ ।

यस्तै सार्वजनिक रुपमा बारबीक्यू (मासु पोलेर खान) गर्नका लागिपनि सरकारले २ मिटरको समय सिमा कायम गरेर अनुमति प्रदान गरेको छ । तर खानुअघि हात धुने तथा स्यानिटाइजरको प्रयोग भने अनिवार्य गरिएको छ । यद्यपि बेलायतसँगै जोडिएको स्कटल्याण्डमा भने यो नियम भोलिदेखि नै लागू गरिने सरकारको भनाई छ ।

कोरोनाका कारण बेलायतको लण्डनस्थित पर्यटकीय स्थलमा देखिएको सुनसान । तस्वीर साभार : इन्टरनेट

तर आयरल्याण्डमा भने जुन १ देखिमात्रै यो नियम लागू हुनेछ । सरकारले यहाँका स्वास्थ्यतथा अन्य विभिन्न क्षेत्रसँग सम्बन्धित विशेषज्ञ तथा चिकित्सकहसँग सल्लाह गरेर कारोनालाई मध्यनजर गरी जारी आपत्कालीन अवस्थालाई विस्तारै सहज बनाउने निर्णय गरेको हो । यस्तै, नर्सरी र प्राइमरी स्कुलहरु भने आगामी सातादेखि नै सञ्चालनमा ल्याइने छ । खुद्रा पसल बजार, कारका सोरुमहरु, तथा अन्य पसलहरुलाई पनि आगामी जुन १ देखि खोल्ने अनुमति प्रदान गरिएको बिबिसीले जनाएको छ ।

यद्यपि यसका लागि पसल सञ्चालकको पछिल्लो पाँच पटकको कोरोना परीक्षण नेगेटिभ हुनुपर्ने छ । बेलायतमा हालसम्म कोरोनाका कारण ३७ हजार ८ सय ३७ जनाको ज्यान गएको छ भने २ लाख ६९ हजार १ सय २७ जनामा कोरोना संक्रमण देखिएको छ ।