काठमाडौंमा डाक्टर कुटपिट प्रकरण : डिएसपी लम्साललाई जिम्मेबारीबाट हटाईयो

Best Khabar Team | २०७७ बैशाख ४ गते बिहिबार

१६ अप्रिल, २०२०
काठमाडौं । डिउटी सकेर घर फर्कने क्रममा रहेका चिकित्सकहरुमाथि भएको कुटपिटको घटनामा संलग्न प्रहरीमाथि नेपाल प्रहरीको केन्द्रीय कार्यालयले विभागीय कारबाही अघि बढाएको छ । घटनामा संलग्न महानगरीय प्रहरी वृत्त, महाराजगञ्जका डीएसपी उमेशराज लम्साललाई प्रहरी कार्यालयले जिम्मेवारी मुक्त गराएको छ ।

गएराति शिक्षण अस्पतालमा डिउटी सकेर डेरामा फर्कने क्रममा शिक्षण अस्पतालमा कार्यरत डा.शम्भु खनालमाथि लकडाउन उल्लङ्घन गरेको भन्दै लम्साल नेतृत्वको टोलीले कुटपिट गरेको घटना सार्वजनिक भएसँगै प्रहरीले कारबाही अघि बढाएको हो । कुटपिटको घटना मिडियाबाट बाहिर आएपछि प्रहरीले घटनाको विषयमा गहन अनुसन्धान गरी घटनामा संलग्न लम्साललाई महानगरीय प्रहरी आयुक्तको कार्यालयमा तानेर थप अनुसन्धान अघि बढाएको बढाएको जनाएको छ ।

घटनाको छानबिनका लागि प्रहरले एसएसपी किरण बज्राचार्यको नेतृत्वमा ३ सदस्यीय छानबिन समिति गठन गरेको थियो । महामारीको बेला डिउटीमा खटिएका चिकित्सकमाथि कुटपिट गरेको घटनाको चौतर्फी आलोचना भएपछि प्रहरीले यो घटनालाई निक्कै गम्भीरताका साथ लिएर अनुसन्धान प्रक्रिया अघि बढाएको थियो ।

Comment from facebook