अन्तर्राष्ट्रीय उडान रोक्ने समयसिमा पनि थपियो, अब मे ३० सम्म अन्तर्राष्ट्रीय उडान नहुने

Best Khabar Team | २०७७ बैशाख २४ गते बुधबार

०६ मे, २०२०
काठमाडौं । कोरोना भाइरसको प्रकोप नियन्त्रणका लागि सरकारले अन्तर्राष्ट्रीय  उडान रोक्नका लागि तोकेको समय सिमा थप गरेको छ । कोरोना संक्रमण उच्चस्तरीय समितिको सिफासिरसमा सरकारले आगामी जेठ१८ गतेसम्म ( मे ३०) का लागि विदेशबाट यात्रु लिएर आउने कुनैपनि यात्रुबाहक उडान तथा नेपालबाट बाहिर जाने (चार्टर बाहेक) विमानहरुमा पूर्णरुपमा रोक लगाउने निर्णय गरेको हो ।

यसअघि सरकारले जेठ २ गतेसम्मका लागि अन्तर्राष्ट्रीय  उडानमा प्रतिबन्ध लगाउने निर्णय गरेको थियो । तर छिमेकी मुलुक भारतलगायत विश्वका अधिकांश देशमा अहिलेपनि कोरोना भाइरस नियन्त्रण बाहिर रहेको भन्दै तत्काल हवाई उडान रोक्ने निर्णय गरेको हो । यस अवधिमा पनि नेपालमा अलपत्र परेका विदेशी नागरिक लिनका लागि आउने चार्टर विमानहरु तथा नेपालबाट अत्यावश्यक सामग्री लिन विदेश जाने विमानहरुले उडान भर्न पाउनेछन् ।

नेपालमा पहिलो चरणमा देखिएका सबै कोरोना संक्रमितहरु विदेशबाटै आएकाहरु भएकोले पनि अन्र्तराष्ट्रिय उडानमा थप कडाई गर्दै जेठ १८ सम्मको समयसिमा लम्ब्याइएको मन्त्रीपरिषद् स्रोतको भनाई छ । यसैबीच सरकारले सीमा क्षेत्रको नाकाबन्दी पनि आगामी जेठ १८ सम्मका लागि थप गरेको जनाएको छ ।

Comment from facebook