बाजुरा जीप दुर्घटनका घाइतेलाई सेनाको हेलिकोप्टरबाट उद्दार, मृतकमध्ये ४ को सनाखत

Best Khabar Team | २०७६ फाल्गुन १८ गते आइतबार

०३ डिसेम्बर, २०२०
मार्तडी । बिकट हिमाली जिल्ला बाजुराको कालापहाडमा बिहीबार भएको सडक दुर्घटनामा घाइते भएकाहरुको नेपाली सेनाको हेलिकोप्टरले उद्दार गरेको छ । घाइते ४ जनालाई दुर्घटनालगत्तै स्थानीय कोल्टी अस्पतालमा उपचाररार्थ भर्ना गरिएको भएपनि उनीहरुलाई थप उपचारको आवश्यकता परेको भन्दै सेनाको हेलिकोप्टरबाट नेपालगञ्ज लगिएको छ । घाइतेहरुको अवस्था अहिले स्थिर रहेको छ ।

जिल्लाको हिमाली गाउँपालिकाको बाजोमा भएको जीप दुर्घटनामा ५ जनाको घटनास्थलमै ज्यान गएको थियो । से१ज १०६४ नं को बलेरो जिप सडकबाट ३ सय मिटर तल कर्णाली नदीमा खसेको बताइएको छ । दुर्घटनाको कारण खुल्न सकेको छैन । जीपका चालक एवं जीप धनी रमेश शाही, स्थानीय पवन भण्डारी, स्वमीकात्तिक गाउँपालिकाका शुशीला विक, कैलालीका दिनेश घर्तीमगर र हिमाली गाउँपालिकाका का एकको दुर्घटनामा परी ज्यन गएको हो ।

घाइते, मुगु जिल्लाको कर्मरोग गाउँपालिका–८ का थेम्चो लामा, कर्मरोग–८ कै तोर्सी लामा, बाजुरा बूढीनन्दा नगरपालिका–६ का सरु विक र उनकी दुई वर्षीया छोरी स्मृति विकलाई अहिले कोहलपुर मेडिकल कलेजमा उपचारार्थ भर्ना गरिएको छ । दुर्घटनाग्रस्त जीप कर्णाली नदीमा डुबेको अवस्थामा भेटिएको छ ।