नयाँवर्ष मनाउने क्रममा भएको आगलागीमा परी स्विट्जरल्याण्डमा ४० जनाको मृत्यु, कम्तीमा ११५ जना घाइते

Best Khabar Team | २०८२ पुष १७ गते बिहिबार

०१ जनवरी, २०२६
प्रतीक लामिछाने/ सेञ्जेन, लक्जम्बर्ग । नयाँवर्ष मनाउने क्रममा स्विट्जरल्याण्डको एउटा स्की रिसोर्टको बारमा भएको आगलागीमा परी हालसम्म कम्तीमा ४० जनाको मृत्यु भएको पुष्टि भएको छ । यो समाचार तयार पार्दासम्म घटनामा परी ४० जनाको मृत्यु भएको स्थानीय सञ्चारमाध्यमहरुले जनाएका छन् । सो घटनामा अहिलेसम्म ११५ जना घाइते भएको बताइको छ । स्विट्जरल्याण्डको दक्षिण पश्चिममा अवस्थित स्की रिसोर्ट क्रान्स–मोन्टानामा नयाँ वर्ष मनाउने क्रममा गएराति भीषण आगोलागी भएको थियो । आगो एक्कासी फैलिएपछि त्यहाँ जम्मा भएका मानिहरुबीच भाडदौड मच्चिएको थियो भने कतिपयको भिडमा किच्चिएर ज्यान गएको हुनसक्ने सुरक्षा अधिकारीहरुले अनुमान गरेका छन् ।

घटनालगत्तै सुरक्षाकर्मी, रेडक्रस तथा अन्य सामाजिक सुरक्षामा खटिएका स्वयंसेवकहरुको टोलीले घटनास्थलबाट घाइतेको उद्दार गरेका थिए । स्थानीय समय अनुसार बिहान करिब साढे १ बजे आगलागी शुरु भएको थियो । बिबिसीका अनुसार ज्यान गुमाउनेहरुमा नयाँवर्ष मनाउन सो रिसोर्ट तथा बारमा भेला भएका स्थानीय तथा पर्यटकहरु रहेको बताइको छ । घाइतेमध्ये धेरैको अवस्था गम्भीर रहेको स्थानीय समाचारमाध्यमले जनाएका छन् । घाइतेहरुको स्विट्जरल्याण्ड र इटालीका विभिन्न अस्पतालमा उपचार भै रहेको छ ।

प्रत्यक्षदर्शीहरुका अनुसार शैम्पेनको बोतलमाथि राखिएको मैनबत्तीबाट एक्कासी छतमा आगो सल्किएको थियो । घटनाको बारेमा स्थानीय अधिकारीहरुले अनुसन्धान शुरु गरेका छन् । नयाँ वर्ष मनाउने क्रममा भएको यो दुःखद घटनामा परी विश्वका विभिन्न देशका पर्यटकहरुको ज्यान गएको हुनसक्ने आशंका गरिएको छ । मृतक तथा घाइतेहरुको हालसम्म सनाखत हुन सकेको छैन ।