काठमाडौंको सुन्धारा आसपासमा आज दिउँसोदेखि सवारी आवागमन प्रभावित हुने

Best Khabar Team | २०७६ पुष १६ गते बुधबार

०१ जनवरी, २०२०
काठमाडौं । नेपाल भ्रमणवर्षको उद्घाटन कार्यक्रमका कारण आज दिउँसो १ बजेपछि काठमाडौंको सुन्धारा क्षेत्रमा सवारी आवागमन प्रभावित हुने भएको छ । दिउँसो ४ बजे त्रिपुरेश्वरस्थित दशरथ रंगशालामा आयोजना हुन लागेको नेपाल भ्रमणवर्षको औपचारिक कार्यक्रमका कारण सुन्धारा आसपासका क्षेत्रमा अत्याश्यक सवारी साधनबाहेक अन्य सवारी साधन प्रवेशमा रोक लगाइएको ट्राफिक प्रहरी महाशाखाले जनाएको छ ।

प्रहरीका अनुसार राजधानीको भद्रकाली माइतीघर थापाथली, टेकुलगायतका क्षेत्र भएर रंगशाला आसपासमा चल्ने सार्वजनिक तथा निजी सवारी साधन चलाउन रोक लगाइएको हो । नेपाल भ्रमणवर्ष २०२० को उद्घाटन कार्यक्रमका लागि राष्ट्रपति, प्रधानमन्त्रीलगायत उच्च पदस्थ अधिकारीहरु रंगशाला जाने कार्यक्रम रहेकोले सुरक्षाको लागि भन्दै सो क्षेत्रमा सवारी प्रवेशमा रोक लगाइएको हो ।

यस्तै विभिन्न संघसंस्थाले राजधानीका विभिन्न स्थानबाट कला र संस्कृति झल्कने झाँकीसहित रंगशालामा हुने भ्रमणवर्ष कार्यक्रममा सहभागिता जनाउने भएकाले पनि सो क्षेत्रमा अत्यावश्यक बाहेकका सवारी साधन प्रवेशमा रोक लगाइएको हो । लाखौंको उपस्थितिमा सरकारले आज नेपाल भ्रमणवर्ष २०२० को औपचारिक घोषणा गर्दैछ । प्रहरीले सो क्षेत्र भएर चल्ने सवारी साधनलाई बैकल्पि मार्ग प्रयोग गर्न आग्रह समेत गरेको छ । उद्घाटन कार्यक्रम साँझ ६ बजेसम्म चल्ने बताइएको छ ।