दुबईबाट आइपुगे १६९ नेपाली, विमानस्थलबाट सिधै ‘होल्डिङ्ग सेन्टर’ पु-याईयो

Best Khabar Team | २०७७ जेठ २३ गते शुक्रबार

०५ जुन, २०२०
काठमाडौं । संयुक्त अरव इमिरेट्सको सार्जाबाट नेपालका लागि छुटेका डेढसय बढी नेपालीहरुसहित एयर अरेवियाको विमान चढेर काठमाडौं अवतरण गरेको छ । उनीहरु आज साँझ ६ बजेर १० मिनेट जाँदा काठमाडौंको त्रिभुवन विमानस्थलमा अवतरण गरेका हुन् । विमानस्थलमा प्रारम्भिक स्वास्थ्य परीक्षणपछि उनीहरुलाई राजधानीका विभिन्न स्थानमा बनाइएको ‘होल्डिङ्ग सेन्टर’ पु-याइएको छ । हाल काठमाडौं, ललितपुर र भक्तपुरका करिब १ दर्जन स्थानमा बनाइएका होल्डिङ्ग सेन्टरमा उनीहरुलाई राखिएको छ ।

विमानस्थलबाट नेपाली सेनाले सबैको तथ्यांक लिएर उनीहरुको स्थायी घर अनुसार हरेक प्रदेशका नागरिकका लागि बेग्लाबेग्लै स्थानमा लगिएको हो । देशको सातवटै प्रदेशका नागरिकलाई बस्न मिल्ने गरी काठमाडौंमा क्वारेन्टाइन र होल्डिङ्ग सेन्टर स्थापना गरिएको छ । काठमाडौं आइपुगेकाहरुलाई आजको राती त्यही राखिने र भोलि बिहान सम्बन्धित प्रदेशको क्वारेन्टाइनमा राखिने बताइएको छ । उनीहरुले क्वारेन्टाइनमा कम्तीमा २ साता विताउनुपर्ने हुन्छ ।

**तस्वीरहरु : प्रदिप शर्मा । बेस्टखबर डटकम**

१ जना बालकसहित १ सय ६९ जना नागरिक र एउटा शव समेत लिएर एयर अरेवियाको विमान दुबईको स्थानीय समय अनुसार बिहान १२ बजे सार्जा विमानस्थलबाट उडेको थियो । सरकारले विदेशमा रहेका र तत्काल नेपाल फर्कन चाहने र बाध्यतामा रहेका नेपालीहरुलाई लक्षित गरी उद्दार कार्य थालेसँगै आज पहिलो पटक विदेशबाट नेपाली नागरिकहरु आउन शुरु गरेका हुन् । यस क्रममा आजै बर्माबाट पनि बिहान २६ जना नेपाली स्वदेश फर्केका थिए ।

यसअघि दुबईबाट १ सय ५७ जना यात्रुसहित विमान नेपाल आएको जानकारी प्राप्त भएपनि नेपाल आउनेको संख्या १ सय ६९ रहेको विमानस्थल स्रोतले जानकारी दिएको छ ।

यो पनि पढ्नुहोला ।