एक वर्ष नपुग्दै दोश्रोपटक बन्द हुँदै पाँचतारे होटल हायात

Best Khabar Team | २०७६ चैत्र ६ गते बिहिबार

१९ मार्च, २०२०
काठमाडौं । विश्वव्यापी माहामारीकोरुपमा फैलिएको कोरोना भाइरसका कारण पर्यटक आउन छाडेपछि काठमाडौंको बौद्धमा रहेको पाँचतारे होटल हायात भोलिदेखि कम्तीमा डेढ महिनाका लागि बन्द हुने भएको छ । विशेषगरी विदेशी पर्यटकहरुकै कारण चलेको यो होटल सरकारले विभिन्न देशबाट आउने विदेशी पर्यटकहरुलाई नेपाल आउन रोक लगाएपछि र विमानहरुको उडान रोकिएपछि बन्द हुने अवस्थामा पुगेको हो ।

होटल व्यवस्थापनका अनुसार भोलिदेखि होटल ६ साताका लागि बन्द हुँदैछ । अहिलेको अवस्थामा कोरोनाको उच्च जोखिमका कारण होटल बन्द गर्नुपरेको होटल व्यवस्थापनले जनाएको छ । तर त्यहाँ कार्यरत कर्मचारीलाई कसरी विदा दिने भन्ने विषयमा छलफल चलिरहेको बताइन्छ । यसअघि कर्मचारी आन्दोलनका कारण गएको जेठ महिनामा होटल बन्द भएको थियो ।

पछि कर्मचारी र होटल प्रशासनबीच सहमति भएपछि होटल असार महिनाबाट सञ्चालनमा आएको थियो । काठमाडौंमा पर्यटकहरु आउनेक्रम सून्य भएपछि काठमाडौंका अधिकांश होटलहरु बन्द हुने अवस्थामा पुगेका छन् । कतिपयले कर्मचारीलाई केही समय विदा दिएका छन् भने कतिपय होटलहरुले आधा तलव दिएर कर्मचारीलाई विदा गरेका छन् । कोरोना भाइरसको प्रकोपका कारण यसपटक नेपालको पर्यटन क्षेत्र नराम्ररी चपेटामा परेको छ । सरकारले घोषणा गरेको भ्रमणवर्ष २०२० पनि स्थगित भएको छ ।

होटल हायात सम्बन्धी थप समाचार