नेकपाको निर्णय : ३ नम्बर प्रदेशको नाम बाग्मती, केन्द्र हेटौंडा

Best Khabar Team | २०७६ पुष १३ गते आइतबार

२९ डिसेम्बर, २०१९
काठमाडौं । नेपाल कम्युनिष्ट पाटी (नेकपा) ले प्रदेश नम्बर ३ को राजधानी औद्योगिक नगरीको रुपमा परिचित मकवानपुरको हेटौंडामा राख्ने निर्णय गरेको छ । नेकपा सचिवालयको आजको बैठकले मकवानपुरको हेटौंडामा प्रदेश नम्बर ३ को राजधानी राख्ने र यो प्रदेशको नाम बाग्मती राख्ने निर्णय गरेको हो ।

यसअघि नेकपामा प्रदेश नम्बर ३ को राजधानी कहाँ राख्ने भन्ने विषयमा एकमत थिएन । नेकपा बन्नुअघिको तत्कालीन माओवादी र एमालेका नेताहरुबीच प्रदेश नम्बर ३ को राजधानी र नामका विषयमा मतैक्यता हुन सकेको थिएन ।

दुई पार्टीबीच एकता भएपछि पनि कतिपय नेताहरुले काठमाडौंलाई नै राजधानीको रुपमा राख्नुपर्नेमा जोड दिएका थिए भने कतिपय नेताले हेटौंडा र कतिले काभ्रे तथा भक्तपुरलाई केन्द्र बनाउनुपर्ने बताउँदै आएका थिए ।

बैठकले प्रदेश कमिटी तथा प्रदेशसभा सम्बन्ध पार्टी निकायलाई समेत राजधानी र प्रदेशको नामको विषयमा जानकारी गराउने निर्णय गरेको हो । प्रदेशको नाम र राजधानीका विषयमा विगत २ वर्षदेखि नेकपाले निर्णय गर्न सकेको थिएन ।

Comment from facebook