‘गैरकानुनी क्रियाकलापमा संलग्न भएको आशंकामा काठमाडौंबाट दर्जनौं चिनियाँ नागरिक पक्राउ

Best Khabar Team | २०७६ पुष ७ गते सोमबार

२३ डिसेम्बर, २०१९
काठमाडौं । पछिल्लो समयमा नेपालमा चिनियाँ नागरिकले विभिन्न गैरकानुनी कार्य गरिरहेको विशेष सुराकीको आधारमा प्रहरीले आज काठमाडौंका विभिन्न स्थानमा छापा मारेको छ । यस क्रममा दर्जनौं चिनियाँ नागरिकलाई पक्राउ गरेको जनाइएको छ ।

प्रहरीले काठमाडौंको मनमैजु, बुढानिलकण्ठ, बाँसबारीलगायतका स्थानमा चिनियाँ नागरिकले लिएको घरको खानतलासी लिएर उनीहरुलाई पक्राउ गरेको हो । यद्यपि प्रहरीले पक्राउ परेकाहरुको गैरकानुनी क्रियाकलापको बारेमा भने केही बताएको छैन । पक्राउ परेकाहरुमध्ये अधिकांश चिनियाँ नागरिक पर्यटक भिषामा काठमाडौं आएर विभिन्न किसिमका गैरकानुनी गतिविधिमा संलग्न भएको सूचना प्रहरीले फेला पारेपछि उनीहरुलाई नियन्त्रणमा लिएको हो ।

राजधानीको बाँसबारी, बुढालिकण्ठलगायतका स्थानमा चिनियाँ नागरिकले घर नै भाडामा लिएर अज्ञात गतिविधि सञ्चालन गर्दै आइरहेका थिए । मनमैजुस्थित एक ६ तलाको घर भाडामा लिएर करिब ५० भन्दा बढी चिनियाँ नागरिक बस्दै आएका थिए । उनीहरुले सो घरको भाडामात्रै प्रतिमहिना झण्डै २ लाख ५० हजार रुपैयाँ तिर्दै आएको स्रोतको भनाई छ।

यस्तै उनीहरुले एकदर्जन बढी निजी जिप तथा एउटा ४० सिट क्षमताको यात्रुबाहक पर्यटक बस समेत भाडामा लिएका थिए । ती सबै सवारी साधन भाडामा लिँदा उनीहरुले ५ लाख भन्दा बढी रकम सवारी साधनमा मात्रै खर्च गर्ने गरेको स्रोतको भनाई छ । उनीहरुलाई नजिकबाट नियाल्नेहरुका अनुसार उनीहरु ल्यापटमै बसेर काम गरिरहेका देखिन्थे । तर उनीहरु किन र के प्रयोजनका लागि त्यहाँ बसिरहेका छन् भन्ने विषयमा कुनै जानकारी सार्वजनिक राज्य र सुरक्षाकर्मीलाई छैन ।

मनमैजुको एक घर उनीहरुले भाडामा लिएर करिब १ वर्षदेखिदेखि अज्ञात धन्दा सञ्चालन गर्दै आइरहेका थिए । उनीहरु बस्ने घरमा नेपालीहरुलाई पहिलो तल्लाभन्दा माथि प्रवेशमा रोक लगाइएको थियो । स्मरणीय के छ भने केहीसमय अघि काठमाडौंमा काठमाडौंमा विभिन्न एटिएम मेसिनहरु ह्याक गरेर करोडौं रकम निकाल्ने कार्यक्रममा चिनियाँ नागरिहरुनै संलग्न रहेका थिए । उनीहरुलाई पक्राउ गरी प्रहरीले सार्वजनिक समेत गरेको थियो ।

हाल चितवनको पारस बसपार्क आसपासका क्षेत्रमा पनि दर्जनौं चिनियाँ नागरिकले घर भाडामा लिएर अज्ञात गतिवधि सञ्चालन गर्दै आइरहेका छन् । पक्राउ परेकाहरुको घर खानतलासी गर्ने क्रममा प्रहरीले ठूलो मात्रामा ल्यापटप तथा मोबाइलहरु बरामद गरेको छ । ति ल्यापटप तथा मोबाइलको बैज्ञानिक परिक्षणपछि मात्रै उनीहरुले के काम गरिरहेका थिए भन्ने विषयमा तथ्य बाहिर आउने प्रहरीको भनाई छ । अहिलेसम्म प्रहरीले खानतलासी अभियानका क्रममा करिब १ सय जना चिनियाँ नागरिकलाई पक्रेको जनाएको छ ।

Comment from facebook