Best Khabar Team | २०२६ पुष १७ गते बिहिबार

---

१९ डिसेम्बर, २०१९
बेस्टखबर प्रतिनिधि, आल्बुफेरा । युरोपेली मुलुक पोर्चुगलका विभिन्न स्थानमा पानीसँगै आएको हावाहुरीले दर्जनौं स्थानमा रुखहरु लडाएको छ । रुखहरु लड्दा कतिपय ठाउँमा बाटोहरु अवरुद्ध बनेको छ भने कतिपय स्थानीयको घर रुखले च्यापेको छ । स्थानीय नागरिक सुरक्षा अधिकारीका अनुसार राजधानी लिस्बोनसहित देशका प्राय सबै क्षेत्रको मौसम अपरान्हदेखि विग्रेको हो । यो अवस्था आइतबारसम्म जारी रहने त्यहाँको मौसम पूर्वानुमान महाशाखाले जनाएको छ ।

हावाहुरीका कारण पोर्चुगलका उत्तरी क्षेत्र एभेइरो, भिसाउ, ब्राघा, पोर्तो तथा भियानादा दु कास्तेलोलगायतका क्षेत्र बढी प्रभावित भएको छ । यस्तै पोर्चुगलको पर्यटकीय क्षेत्र अल्गार्भमा पनि हावाहुरीसँगै परेको पानीका कारण समुद्री सतहको लेबल बढेको छ । जसका कारण केही ठाउँमा बस्तीतर्फ पानीको बहाव बढ्न थालेको छ ।

यस्तै दर्जनौं स्थानमा रुखहरु ढलेर सडक तथा घरहरु च्यापेको छ । पर्यटकीय क्षेत्र अल्गार्भका लागोआ, पोर्तिमाउ तथा सिल्भासलगायतका स्थान बढी प्रभावित भएको बताइएको छ । कतिपय स्थानमा पानीको तह खतराको सूचिभन्दा आधा मिटर माथिसम्म आइपुगेको छ । यस्तै अलमादा, सेतुबहाल, सान्तोष तिर्सो तथा पोर्तोलगायतका स्थानका आधादर्जन स्थानीय परिवार रुखहरु ढलेपछि घर छाडेर बाहिरिएका छन् ।

अहिले हावाहुरी र बाढी प्रभावित स्थानमा सुरक्षाकर्मी तथा स्थानीय उद्दारकर्ता पुगेर उनीहरुलाई सुरक्षाको उपाय अपनाउन आग्रह गरिरहेका छन् । यो क्रम डिसेम्बर २२ सम्म जारी रहने मौसम विभागको भनाई छ ।

तस्वीर सौजन्य : सेफ कमिसन पोर्चुगल

---

Comment from facebook