भारतीय नम्बर प्लेटको जीप दुर्घटना हुँदा उदयपुरमा ३ को मृत्यु, ५ घाइते

Best Khabar Team | २०७६ पुष ३ गते बिहिबार

१९ डिसेम्बर, २०१९
गाईघाट। पूर्वी नेपालको उदयपुरमा यात्रुबाहक जीप दुर्घटना हुँदा ३ जनाको घटनास्थलमै ज्यान गएको छ । अरु ५ जना घाइते भएका छन् । प्रहरीका अनुसार भारतीय नम्बर एस के ०१ पिबी ३०६८ नम्बरको यात्रुबाहक जीप जिल्लाको उदयपुरगढी गाउँपालिका वडा नम्बर ३ मा दुर्घटनामा परेको हो ।

दुर्घटनामा उदयपुरगढी गाउँपालिका ३ का ६०वर्षीय सेतबहादुर श्रेष्ठ, ५० वर्षीय ढकबहादुर स्मालीमगर र ३६ वर्षीय मिन बहादुर श्रेष्ठको ज्यान गएको हो । भारतको सिक्किमबाट आफन्तलाई भेटेर फर्कने क्रममा आज बिहान ७ बजे सो जीप दुर्घटनामा परेको बताइएको छ । बाक्लो हुस्सु लागेका कारण जिप चालकले बाटो नदेखेका कारण नियन्त्रण गुमाउँदा जीप दुर्घटनामा परेको बताइएको छ ।

दुर्घटनामा घाइते भएकाहरुको स्थानीय अस्पतालमा उपचार भै रहेको छ । गम्भीर घाइतेलाई जिल्ला अस्पतालमा उपचारका लागि भर्ना गरिएको छ ।