कालिन्चोकबाट फर्केको बस सिन्धुपाल्चोकमा दुर्घटनाग्रस्त, १५ को मृत्यु, १७ घाइते

Best Khabar Team | २०७६ मंशिर २९ गते आइतबार

१५ डिसेम्बर, २०१९
काठमाडौं । प्रसिद्ध धार्मिकस्थल दोलखाको कालिञ्चोक भगवतीको दर्शन गरेर फर्केका तीर्थयात्री चढेको बस आज सिन्धुपाल्चोकमा दुर्घटनाग्रस्त भएको छ । दुर्घटनामा परी १५ जनाको ज्यान गएको छ भने अरु १७ जना घाइते भएका छन् ।

कालिञ्चोकबाट काठमाडौं आउँदै गरेको बा४ख ४४६८ नम्बरको बस आइतबार बिहान सडकबाट ५०० मिटर तल खसेर दुर्घटनामा परेको हो । दुर्घटनामा ज्यान गुमाउनेमध्ये ५ जनाको सनाखत भएको छ । बसको स्टेरिङ तथा टायरमा समस्या देखिँदा–देखिँदै चालकले जवरजस्ती गाडी चलाएकोले बस दुर्घटनामा परेको दुर्घटनाका घाइतेहरुले बताएका छन् । गम्भीर घाइतेहरुलाई उपचारको लागि काठमाडौं ल्याइएक छ भने सामान्य घाइतेहरुको सिन्धपाल्चोक तथा काभ्रेका विभिन्न अस्पतालमा उपचार भै रहेको छ ।

दुर्घटनामा सिन्धुपालचोक जुगल गाउँपालिका ७ का सुकबहादुर तामाङ्ग, सविना तामाङ्ग, दोलखा विभेश्वर नगरपालिकाकी जुनुमाया तामाङ्ग, मञ्जु तामाङ्ग रामेछापको उमाकुण्ड गाउँपालिका वडा नम्बर ५का महेश तामाङ्ग र भक्तपुर सूर्यविनायकका चिनु बस्नेतको सनाखत भएको भएको छ । दुर्घटनालगत्तै गाडीका चालक फरार रहेका छन ।

घाइते यात्रुहरुका अनुसार जर्वजस्ती चालकले ‘कन्डिसन’मा नभएको गाडी चलाउँदा दुर्घटनामा परेको हो । दुर्घटना हुँदै गर्दा चालक सिटको ढोका खोलेर चालक फरार रहेको प्रत्यक्षदर्शीहरुले जनाएका छन् ।