राष्ट्रिय सुरक्षा एवं गोपनियता माथि खतरा देखाउँदै क्यानडामा टिकटकमाथि प्रतिबन्ध !

Best Khabar Team | २०७९ फाल्गुन २२ गते सोमबार

०६ मार्च, २०२३ टोरन्टो, क्यानडा । चिनियाँ कम्पनीद्वारा सञ्चालित बहुचर्चित मोबाइल एप ‘टिकटक’ माथि क्यानडा सरकारले प्रतिबन्ध लगाउन शुरु गरेको छ । यसको शुरुवात सरकारी कार्यालयमा कार्यरत कर्मचारीलाई कार्यालयको कम्प्युटर र इन्टरनेट प्रयोग गरी टिकटक चलाउन प्रतिबन्ध लगाईको छ ।

अमेरिकालगायतका विश्वका विभिन्न देशले चीनमा प्रमुख कार्यालय रहेको सामाजिक सञ्जाल टिकटकले प्रयोगकर्ताको बारेमा व्यक्तिगत सामाग्री, गोपनियता, स्थानलगायतका महत्वपूर्ण सूचना संकलन गरिरहेको आरोप लगाईरहेकै बेला क्यानडा सरकारले यो निर्णय गरेको हो । टिकटक एप मार्फत् टिकटक कम्पनीले प्रयोगकर्ताको नितान्त व्यक्तिगत जानकारी, सूचनालगायतका डाटा संकलन गरिरहेको र यसले राष्ट्रिय सुरक्षा र गोपनियतामाथि गम्भीर असर गरेको भन्दै क्यानडा सरकारले सरकारी कार्यालयहरुको सर्भर तथा कम्प्युटर प्रयोग गरी टिकटक नचलाउन कर्मचारीहरुलाई भनेको हो ।

हालै यहाँका प्रधानमन्त्री जस्टिन ट्रुडोले आफ्ना देशमा रहेका टिकटक प्रयोगकर्ताहरुको व्यक्तिगत जानकारी चुहावट हुन नदिन सरकार गम्भीर रहेको भन्दै पहिलो चरणमा सरकारी कार्यालयका कर्मचारीहरुलाई टिकटक चलाउन रोक लगाइएको बताएका छन् । आउँदा दिनमा निजी व्यापारिक फर्म, विभिन्न संघ संस्थालगायत निजी प्रयोगकर्ताहरुले पनि यो विषयमा गम्भीर बन्न प्रधानमन्त्रीले ध्यानाकर्षण गराएको सिएनएनले आफ्नो अनलाईन संस्करणमा उल्लेख गरेको छ ।

यसअघि युरोपेली संघ तथा अमेरिकाले पनि टिकटकले राष्ट्रिय सुचना तथा जानकारी संकलन गरिरहेको भन्दै यसको प्रयोगलाई रोक्नका आवश्यक कदम चाल्ने निर्णय गरेका थिए । चिनियाँ टिकटक निर्माता कम्पनीले भने यी आरोपहरुको खण्डन गर्दै टिकटले प्रयोगकर्ताहरु गोपनियताको उच्च सम्मान गरेको जनाएको छ ।