दुर्घटनाग्रस्त एति एयर प्रकरण : २६ जनाको शव भेटियो, ५ भारतीयसहित ११ विदेशी यात्रु

Best Khabar Team | २०७९ माघ १ गते आइतबार

१५ जनवरी, २०२३
चिप्लेढुंगा, पोखरा । आज बिहान पोखरामा दुर्घटनाग्रस्त विमानमा सवार ७२ मध्ये २६ जनाको शव भेटिएको घटनास्थलमा उद्दारमा खटिएको प्रहरीले जनाएको छ । घटनास्थलमा खटिएको प्रहरी टोलीले दिएको जानकारी अनुसार दुर्घटनास्थलमा खटिएको प्रहरी तथा सेनाको संयुक्त उद्दार टोलीले हालसम्म २६ जनाको शव संकलन गरेको छ । दुर्घटनामा परी घाइते भएका केहीलाई अस्पतालमा उपचारका लागि पठाइएको छ । दुर्घटनास्थल सेती नदीको खोचमा रहेकोले कठिनाई भएको प्रहरीको भनाई छ ।

११ विदेशी पर्यटक
प्रहरीको अनुसार विमानमा ११ जना विदेशी पर्यटक रहेको खुलेको छ । विमानस्थल स्रोतले दिएको जानकारी अनुसार आज बिहान दुर्घटनामा परेको सो विमानमा ५ जना भारतीय नागरिक, रसियन, एक आयरल्याण्डी, दुई कोरियन एवं एक अर्जेटिना, अष्ट्रेलिया, फ्रान्सका एकएकजना यात्रु रहेको नागरिक उड्डयन प्राधिकरणले जनाएको छ ।

दुर्घटनाग्रस्त विमानमा सवारमध्ये ५ जना भारतीय नागरिक रहेको बताइएको छ । चालकदलका ४ जना सदस्यसहित आज बिहान काठमाडौंबाट साढे १० बजे पोखराका लागि उडेको सो विमान पोखराको पुरानो विमानस्थलमा अवतरणका क्रममा सेतीनदीमा खसेको थियो ।

दुर्घटनाग्रस्त विमानमा सवार विदेशी नागरिकको नाम खुलेपनि उनीहरुको देशको बारेमा केही खुल्न सकेको छैन । पाइलट कमल केसीले उढाएको सो विमानमा ६ जना बालबालिका, ११ विदेशी पर्यटकका अलावा ४१ जना महिला र २७ जना पुरुष सवार रहेको बताइएको छ ।