कोरोना संक्रमित पूर्वरानी कोमल शाहको आइसियुमा उपचार चल्दै, ज्ञानेन्द्र र प्रेरणाको अवस्था सामान्य

Best Khabar Team | २०७८ बैशाख १६ गते बिहिबार

२९ अप्रिल, २०२१
काठमाडौं । भारतमा आयोजित एउटा धार्मिक कार्यक्रममा सहभागी भएर फर्केपछि कोरोना संक्रमण देखिएपछि काठमाडौंमा उपचाररत पूर्वरानी कोमल शाहको अवस्था गम्भीर बनेको छ । केहीसाता अघि भारतबाट फर्कने क्रममा पूर्वराजा ज्ञानेन्द्र शाहसहित रानी कोमल र उनीहरुकी छोरी प्रेरणा शाह तीनैजनालाई कोरोना भारइरसको संक्रमण देखिएको थियो ।

कोरोना संक्रमण देखिएपछि केहीदिन घरमै आइसोलेसनमा बसेपनि संक्रमण बढ्दै गएपछि उनीहरु बैशाख ११ गते उपचारको लागि काठमाडौंको थापाथलीस्थित नर्भिक अस्पतालमा भर्ना भएका थिए । नर्भिक अस्पतालमा अक्सिजनको सपोर्टमा पूर्वराजारानीको उपचार चलिरहेको भएपछि गएरातिदेखि कोमललाई थप अक्सिजनको सपोर्ट आबश्यक भएकोले अति सघन उपचार कक्ष (आइसियुमा) सारिएको अस्पतालले जनाएको छ ।

उनलाई सास फेर्न गाह्रो भएपछि थप अक्सीजन सपोर्टको आबश्यक परेकोले आइसियुमा भर्ना गरिएको बताइएको छ । उनको अवस्था गम्भीर र स्थिर रहेको अस्पताल स्रोतको भनाई छ । पूर्वराजा ज्ञानेन्द्रको अवस्था सामान्य रहेपनि उनलाई पनि अक्सिजनको सपोर्टमा उपचार गरिएको अस्पतालले जनाएको छ । उनीहरुको छोरी प्रेरणाको भने अस्पतालमा उपचार चरिरहेपनि अवस्था सामान्य रहेको बताइएको छ ।