कोरोनाको जोखिम बढेको भन्दै नेपालगञ्जका विद्यालयहरु १ साताका लागि बन्द

Best Khabar Team | २०७८ बैशाख २ गते बिहिबार

१५ अप्रिल, २०२१
नेपालगञ्ज, बाँके । छिमेकी मुलुक भारतमा कोरोना संक्रमितको संख्या अत्यासलाग्दो ढंगबाट बढ्न थालेपछि बाँके जिल्ला प्रशासन कार्यालयले नेपालगञ्जका सबै विद्यालयहरु एक साताका लागि बन्द गर्ने घोषणा गरेको छ ।

जिल्ला विपत् व्यवस्थापन केन्द्रललगायत सरोकारवालाहरुको बैठकले भोलिदेखि लागूहुने गरी आगामी ७ दिनका लागि नेपालगञ्ज उपमहानगरपालिका भित्र सञ्चालनमा रहेका विद्यालय बन्द गर्ने घोषणा गरेको हो । आजमात्रै स्वास्थ्य मन्त्रालयले देशका १३ जिल्लालाई बढी जोखिमपूर्ण जिल्लाको रुपमा घोषणा गरेको थियो । मन्त्रालयले यस्ता जिल्लामा सञ्चालनमा रहेका रात्रीकालीन व्यवसाय, शिक्षणसंस्थालगायत बढी मानिसहरुको भीडभाड हुने क्षेत्र तत्काल बन्द गर्न भनेको थियो ।

पछिल्लो २४ घण्टामा बाँके जिल्लामा मात्रै कोरोनाका १ सय २३ नयाँ संक्रमित थपिएका छन् । पछिल्ला दिनमा बाँकेको सिमावर्ती भारतीय भूमिबाट हजारौंको संख्यामा नेपाली तथा भारतीय नागरिकहरु नेपालतर्फ भित्रन थालेसँगै जोखिम र संक्रमित बढ्न थालेका हुन् । प्रशासन कार्यालयले सीमा क्षेत्रमा हुने चेकजाँचमा पनि थप कडाई गर्ने निर्णय समेत गरेको छ ।