ब्राजिलमा भेटिएको ‘नयाँ खाले’ कोरोना संक्रमण बेलायत र स्कटल्याण्डमा पनि देखियो

Best Khabar Team | २०७७ फाल्गुन १६ गते आइतबार

२८ फेब्रुअरी, २०२१
वेस्टह्याम, बेलायत । पहिलो पटक ब्राजिलमा भेटिएको कोरोना भाइरसको परिवर्तित स्वरुप (भेरियन्ट)का संक्रमितहरु बेलायत र छिमेकी मुलुक स्टकटल्याण्डमा समेत भेटिएको छ । बिबिसीले जनाए अनुसार केही महिना अघि ब्राजिलमा भेटिएको कोरोना भाइरसका परिबर्तित स्वरुपसहितका संक्रमित बेलायत र स्कटल्याण्डमा आज एकैदिन फेला परेका हुन् ।

स्वास्थ्य अधिकारीहरुका अनुसार हालै ब्राजिलबाट फर्किएकाहरुमा गरिएको परिक्षणका क्रममा नयाँ खाले संक्रमण भेटिएका हो । बेलायती स्वास्थ्य अधिकारीहरुले दिएको जानकारी अनुसार ब्राजिलको उत्तरी क्षेत्रमा पर्ने मनौस नामक शहरमा केही समयअघि भेटिएका बढी जोखिमपूर्ण मानिएको कोरोनाका संक्रमित बेलायतमा पहिलो पटक भेटिएका छन् । भाइरसको परिवर्तित स्वरुपका संक्रमितहरु बेलायतमा ३ र स्कटल्याण्डमा ३ गरी जम्मा ६ जना फेला परेका छन् । ब्राजिलको मानौस शहरमा भेटिएको कोरोनाको परिवर्तित स्वरुपका संक्रमितहरुबाट अन्य धेरैमा एकैपटक भाइरस सर्ने तथ्य पनि केही समयअघि मात्रै सार्वजनिक भएको थियो ।

यसरी भेटिएका मध्ये हालै ब्राजिलको भ्रमणमा गएर फर्केका ३ जना स्कटल्याण्डका नागरिकहरु रहेका छन् । उनीहरु ब्राजिलबाट फ्रान्सको राजधानी पेरिस, लण्डन हुँदै स्कटल्याण्ड पुगेका थिए । यस्तै बेलायतमा भेटिएकाहरुमध्ये २ जना हालै ब्राजिलबाटै आएका रहेका छन् । अर्का एक जना भने पछिल्लो १ वर्ष यता कहिँकतै यात्रा नगरेका स्थानीय भएको अधिकारीहरुले जनाएका छन् । फेब्रुअरीको दोश्रो साता उनीहरु ब्राजिलबाट पेरिस हुँदै लण्डन फर्केका हुन् ।

स्वास्थ्य अधिकारीहरुले यो भाइरस बढी संक्रामक देखिएको भएपनि अहिले कोरोनाको खोप आइसकेकोले आवश्यक सावधानी अपनाउन सकिए यसबाट हुने क्षति कम गर्न सकिने बताएका छन् । पछिल्ला दिनमा बेलायतले कोरोना भाइरसबाट ठूलो क्षति व्यहोर्दै आएको छ । बेलायतमा यो समाचार तयार पार्दासम्म कोरोनाका कारण हालसम्म १ लाख २२ हजार ८ सय ४९ जनाले ज्यान गुमाईसकेका छन् ।