देशभर सक्रिय कोरोना संक्रमितको संख्या १ हजार भन्दा कम

Best Khabar Team | २०७७ फाल्गुन १४ गते शुक्रबार

२६ फेब्रुअरी, २०२१
काठमाडौं । नेपालमा शुक्रबार अपरान्हसम्म देशभर रहेका सक्रिय कोरोना संक्रमितको संख्या १ हजार भन्दा कम रहेका छन् । स्वास्थ्य मन्त्रालयले जारी गरेको तथ्यांकलाई आधार मान्दा हालसम्म देशभर कोरोनाका कारण २ लाख ७२ हजार ९ सय ८४ जनामा कोरोना संक्रमण देखिएको छ । ती मध्ये हालसम्म २ लाख ७० हजार २ सय ७७ जना उपचारपछि घर फर्केका छन् । यस्तै कोरोनाबाट हालसम्म २ हजार ७ सय ७१ जनाको ज्यान गएको छ ।

मन्त्रालको यो तथ्यांक अनुसार अहिलेसम्म कोरोनाका कुल संक्रमित तथा निको हुने र मृतकको संख्या घटाउँदा बाँकी रहेकाहरु अहिले कोरोनाको संक्रमणका कारण होम आइसोलेसन तथा अस्पतालमा उपचार गराईरहेका छन् । यसरी होम आइसोलेसनमा रहेका तथा उपचार गराईरहेकाहरुको संख्या ९ सय ३६ हुन आउँछ । यसैबीच मन्त्रालयले दिएको जानकारी अनुसार पछिल्लो २४ घण्टामा देशभर थप १ सय १२ जनामा कोरोना संक्रमण देखिएको छ । यस्तै पछिल्लो २४ घण्टामा देशभरबाट थप ५४ जनाले कोरोनालाई जितेर घर फर्केका छन् । यस अवधिमा कोरोनाबाट थप ४ जनाले ज्यान गुमाएका छन् ।

पछिल्ला केही साता यता देशभर कोरोना संक्रमितको संख्या घट्न थालेको छ । यस्तै कोरोनाका कारण ज्यान गुमाउनेहरुको संख्या पनि ह्वात्तै घटेको मन्त्रालयको तथ्यांकले देखाएको छ । हाल देशका प्राय सबै जिल्लामा कोरोनाको भ्याक्सिन पुगिसकेको छ भने अग्रमोर्चामा खटिएका स्वास्थ्यकमी, सुरक्षाकर्मी, शव व्यवस्थापन तथा विरामीको सेवामा खटिएका स्वयंसेवक, पत्रकारलगायतले कोरोनाको भ्याक्सिन लगाईसकेका छन् ।

सरकारले पहिलो चरणमा कोरोनाको भ्याक्सिन लगाएकाहरुलाई छिट्टै दोश्रो चरणको खोप लगाउने तयारी गरेको छ । यस्तै ५५ वर्ष उमेर नाघेका सबैलाई खोप लगाउने तयारी सरकारको छ । सरकारले ३ दिनअघि भारतबाट कोरोना भाइरस विरुद्धको दोश्रो चरणको खोप नेपाल ल्याएको छ ।