जापानको फुकुशिमामा शक्तिशाली भूकम्प : लाखौं घरमा विद्युत् सेवा बन्द

Best Khabar Team | २०७७ फाल्गुन १ गते शनिबार

१३ फेब्रुअरी, २०२१
फकुशिमा, जापान । जापानमा शनिबार राति शक्तिशाली भूकम्प गएको छ । जापानको राष्ट्रिय भूकम्प मापन केन्द्रले दिएको जानकारी अनुसार जापानको पूर्वोत्तर क्षेत्रमा रहेको फकुशिमा प्रान्तलाई केन्द्र बनाएर सो भूकम्प गएको थियो । भूकम्पको तीब्रता ७ दशमलव १ रेक्टर स्केलको रहेको बताइएको छ ।

भूकम्पको केन्द्रविन्दु राजधानी टोकियोबाट २ सय ३० किलोमिटर टाढा उत्तर दिशामा रहेको फुकुशिमा शहरको समुद्रको किनारमा रहेको छ । भूकम्पका कारण अहिलेसम्म कुनैपनि मानविय क्षति भएको जानकारी आएको छैन । भूकम्पमा परी अहिलेसम्म दर्जनौं मानिसहरु घाइते भएको विवरण प्राप्त भएका छन् । भूकम्प पछि फुकुशिमा क्षेत्रमा रहेका करिब साढे ८ लाख घरमा विद्युत् सेवा अवरुद्ध भएको अधिकारीहरुले जनाएका छन् ।

भूकम्पका कारण अवरुद्ध रहेको विद्युत् सेवा सूचारु गराउनका लागि विद्युत् सेवाका कर्मचारीहरु लागि परेका छन् । आज गएको भूकम्पपछि कुनै पनि खालको सामुद्रिक आँधीको सम्भावना नरहेको यहाँको मौसम विभागले जनाएको छ । यद्यपि रातिको समयमा भूकम्प गएका कारण यहाँका क्षतिको वास्तविक विवरण प्राप्त हुन सकेको छैन । सुरक्षा तथा अन्य आपतकालीन मानवउद्दारका कार्यसँग सम्बन्धित विभिन्न अधिकारीहरुले उद्दार तथा राहतको कामलाई तीब्रता दिइरहेका छन् । जापानमा सन् २०११ मा आएको भूकम्प र त्यसपछिको सुनामीका कारण झण्डै १९ हजार जनाको ज्यान गएको थियो ।

जापान विश्वमा सबैभन्दा बढी भूकम्प जाने देशको सूचीमा रहेको छ । जापानमा दैनिक सानाठूला दर्जनौं भूकम्प जाने गरेको भएपनि साढे ६ रेक्टरस्केलभन्दा माथिका भूकम्प भने कम मात्रैमा जान्छन् । जापानका अधिकांश भौतिक संरचनाहरु भूकम्पमैत्री छन् ।

Comment from facebook